Праваабарончы цэнтр «ВЯСНА»

Лідэр Аб'яднанай грамадзянскай партыі накіраваў зварот на імя міністра ўнутраных справаў Анатоля Куляшова.

У звароце палітык прапануе міністру патлумачыць дзеянні супрацоўнікаў праваахоўных справаў Жодзінскага ГУУС.

У пятніцу міліцыя зрабіла спробу прадухіліць раздачу недзяржаўнай газеты «Новы час» на прахадной завода БЕЛАЗ. Былі затрыманыя шэсць актывістаў АГП і арганізацыі «Маладыя дэмакраты». Канфіскавана 500 асобнікаў газеты «Новы час».

Лідэр АГП задае пытанне міністру: «Чаму кваліфікацыя супрацоўнікаў міліцыі ў Менску дазваляе на месцы вызначыць, што газета «Новы час» зарэгістраваная ў вызначаным парадку і яе распаўсюд не патрабуе ніякіх ўзгадненняў, а ў Жодзіна гэта не пад сілу 14 супрацоўнікам праваахоўных органаў, якія праводзілі спецаперацыю па затрыманні дэмакратычных актывістаў?»

Анатоль Лябедзька прапаноўвае правесці расследаванне інцыдэнту, які адбыўся, і вярнуць незаконна канфіскаваную інфармацыйную прадукцыю, паведамляе сайт www.ucpb.org.