Аляксандр Мілінкевіч звярнуўся ў Гомельскі абласны суд і пракуратуру
Лідэр Руху "За Свабоду" просіць неадкладна праверыць законнасць пакарання ўдзельнікаў гомельскай акцыі памяці Юрыя Захаранкі 7 траўня.
Заявы ад імя Аляксандра Мілінкевіча дасланыя пракурору Гомельшчыны Валянціну Шаеву і старшыні Гомельскага абласнога суду Людміле Міхальковай.
Аляксандр Мілінкевіч адзначае, што заснавальнік Правабаронча-асветніцкага грамадскага аб’яднання “Рух “За Свабоду” Уладзімір Кацора некалькі разоў па самых надуманых прычынах прыцягваўся да адміністрацыйных арыштаў. У знак пратэсту на неабгрунтаванае і прадузятае рашэнне Суду Цэнтральнага раёну г. Гомеля 25 чэрвеня Уладзімір Кацора ўжо 5 дзень трымае сухую галадоўку, што сур'ёзна пагражае ягонаму здароўю і жыццю.
Лідэр Руху "За Свабоду" просіць тэрмінова праверыць законнасць і абгрунтаванасць складання пратаколаў супрацоўнікамі РУУС Цэнтральнага раёну г. Гомеля па справе Ўладзіміра Кацоры, а таксама Пастановы Суда Цэнтральнага раёну Гомеля ад 25 чэрвеня 2009 г.
