Суд не задаволіў пазоў Галіны Юбко да “СБ- Беларусь сегодня”

2009 2009-06-17T13:09:33+0300 1970-01-01T03:00:00+0300 be http://spring96.org/files/images/sources/ubko_galina.jpg
фота svaboda.org

фота svaboda.org

Суд Савецкага раёну Менску пачаў разгляд пазову Галіны Юбко да газэты адміністрацыі прэзыдэнта “СБ — Беларусь сегодня”. Актывістка грамадзкай ініцыятывы патрабуе абвяржэньня зьвестак, якія лічыць для сябе зьневажальнымі.

 

Галіна Юбко ўваходзіць у грамадзкую ініцыятыву “Жанчыны супроць беззаконьня ў судох”. Тут аб’ядналіся каля ста жанчын, незадаволеных рашэньнямі судовых і праваахоўных органаў. Адны жанчыны дамагаюцца перагляду крымінальных прысудаў сваім сваякам, другія незадаволеныя тым, што не заведзеныя крымінальныя справы на іх крыўдзіцеляў, некаторыя нязгодныя з судовымі рашэньнямі па грамадзянскіх справах. У Галіны Юбко — свая гісторыя, якая не падпадае і пад гэтую катэгорыю: у яе забілі родную сястру, саму спадарыню Юбко прызналі пацярпелай. Але першую справу закрылі, бо, паводле сьледзтва, вінаваты памёр у сьледчым ізалятары. Галіна Юбко падазрае іншага чалавека, піша скаргі, на якія, як яна пераканана, атрымлівае адпіскі. 18 лютага карэспандэнт “Советской Белоруссіі” Віктар Панамароў надрукаваў артыкул “Ня веру!”, у якім напісаў, што нібыта гэта аб’ядналіся пераважна жанчыны, у якіх сваякі “забойцы” і зараз яны дамагаюцца адмены прысудаў “празь сьлёзы, мольбы і ціск на правасудзьдзе”. Галіна Юбко такія зьвесткі ўспрыняла як паклёп і абразу:

 

“Але я з гэтым не пагадзілася і лічу, што закранутыя мае гонар і годнасьць. Бо насамрэч я не сваячка асуджанага, я сама пацярпелая. Забілі і спалілі маю сястру”.

 

Сёньня на працэс у Савецкі суд прыйшло болей за 20 жанчын, якія падтрымліваюць Галіну Юбко і лічаць, што іх таксама абразіў артыкул Віктара Панамарова. Юрысконсульт газэты Аляксей Шпілеўскі на пытаньне судзьдзі Сяргея Сякліцкага пацьвердзіў ранейшую пазыцыю: што пазову Галіны Юбко рэдакцыя не прызнае. Сам аўтар артыкула патлумачыў, чаму ён у артыкуле наўмысна ня згадваў ніводнага прозьвішча:

 

“Ну што тут сказаць? Тут сабраліся тыя, у каго здарылася драма, трагедыя. Я ведаў гэта і пісаў гэтак, каб максымальна нікога не закрануць”, — сказаў Віктар Панамароў.

 

Галіна Юбко патлумачыла суду, чаму лічыць артыкул Віктара Панамарова абразай: бо той напісаў пра іх, і пра яе ў тым ліку, што аб’ядналіся сваякі забойцаў, між тым як яна змагаецца за асуджэньне забойцаў і ніколі не падпісвала б калектыўных скаргаў з такімі асобамі. Жанчына патрабуе праз суд публікацыі аб’ектыўнага артыкула пра справы актывістак ініцыятывы.

 

Падчас судовага паседжаньня судзьдзя Сяргей Сякліцкі выдаліў з залі Ніну Шмялёву. Жанчына дрэнна чуе, яна ўголас падала некалькі рэплік, якія судзьдзя ўспрыняў як парушэньне парадку. Ніна Шмялёва — інвалід першай групы, яна страціла здароўе ў выніку злачыннай нядбайнасьці дактароў. Яшчэ ў 2002 годзе, падчас другой прэзыдэнцкай кампаніі асабіста перадала скаргу Аляксандру Лукашэнку і дамаглася суду над лекарамі. А вось экспэрты, якія далі ілжывае мэдычнае заключэньне, як лічыць Ніна Львоўна, дагэтуль незаконна пазьбягаюць пакараньня. Сёньня ў суд Ніна Шмялёва прыйшла, каб пагаварыць з журналістам Віктарам Панамаровым:

 

“Я на гэтую газэту не падпісаная, я яе купіла. Сказалі, што ёсьць такі артыкул. Я набіраю рэдакцыю „Советской Белоруссіі“, набіраю тэлефон Панамарова і пытаюся: чаму вы напісалі, нібыта там сваякі адных бандытаў? А ён мне кажа: я ўжо забыў, што напісаў, я ўжо пішу іншы артыкул”.

 

Нагадаць гэтую размову журналісту “СБ — Беларусь сегодня” жанчына-інвалід пакуль не змагла.

 

Урэшце суд Савецкага раёну адмовіў Галіне Юбко ў задавальненьні яе пазову да газэты адміністрацыі прэзыдэнта “СБ- Беларусь сегодня” і супрацоўніка газэты Віктара Панамарова. Судзьдзю Сяргею Сякліцкаму для вынясеньня гэтага рашэньня спатрэбілася 10 хвілінаў разважаньняў у асобным пакоі. Галіна Юбко ўжо заявіла, што будзе абскарджваць рашэньне у Менскім гарадзкім судзе.

 

За апошнія месяцы гэта ня першы працэс супроць газэты адміністрацыі прэзыдэнта. Нагадаем, у сакавіку ў Салігорску павесілася праваабаронца Яна Палякова, якая лічыла, што яе незаконна перасьледавала міліцыя. За два дні да сьмерці Паляковай у газэце “СБ — Беларусь сегодня” зьявіўся артыкул, у якім згадвалася Яна Палякова ды іншыя беларускія праваабаронцы. Адзін зь іх, Алег Воўчак, у траўні спрабаваў прыцягнуць да адказнасьці аўтара артыкула, нейкага Ксенафонта Суперфасфатава. Алег Воўчак палічыў, што яго абразілі, але суд пазоў праваабаронцы не задаволіў.

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international