Двум фігурантам “справы 14-ці” зьмякчылі рэжым

Суд Цэнтральнага раёну Менску разгледзеў прапановы супрацоўнікаў міліцыі аб зьмякчэньні ўмоваў адбыцьця пакараньня Алесю Стральцову і Алесю Чарнышову.
Ім заставалася адбываць абмежаваньне волі год, два месяцы і 15 дзён. Суд замяніў абмежаваньне волі на папраўчыя працы. Цяпер цягам гэтага тэрміну хлопцы будуць плаціць па 15% заробку дзяржаве.

Летась хлопцаў пакаралі абмежаваньнем волі на паўтара года ў “справе 14-ці”, абвінаваціўшы іх у арганізацыі масавых беспарадкаў, якія нібыта мелі месца ў часе студзеньскіх акцый прадпрымальнікаў.

Нягледзячы на тое, што Алесь Чарнышоў і Алесь Стральцоў цяпер не адбываюць абмежаваньне волі, яны ня маюць права без дазволу пакідаць межы краіны.