Трое сутак арышту атрымаў Аляксандар Барадаўкін за... маўчаньне

8 верасьня ў Ваўкавыску да трох сутак арышту быў засуджаны старшыня мясцовай раённай арганізацыі Аб’яднанай Грамадзянскай Партыі Аляксандар Барадаўкін. Такое пакараньне суд вызначыў яму за нібыта ўдзел у несанкцыянаваным пікеце.
Нагадаем, што 27 жніўня, калі ў Ваўкавыск прывезьлі ўдзельнікаў паўторнага зьезду Саюзу палякаў Беларусі, на вуліцы сабраліся журналісты, мясцовыя грамадзяне і некаторыя “няправільныя” актывісты СПБ, якіх не пускалі ў будынак. Сярод прысутных быў і Аляксандар Барадаўкін. Паводле яго словаў, актывісты АГП ніякага пікету не праводзілі, а проста стаялі моўчкі з чорнымі жалобнымі павязкамі на руках. У складзеным, аднак, міліцыянтамі пратаколе было запісана, што праводзіўся несанкцыянаваны пікет, а яго ўдзельнікі выкрыквалі антыпрэзыдэнцкія лозунгі і парушалі грамадзкі спакой. Судзьдзя Шукайла, як і чакалася, прызнала Барадаўкіна вінаватым і засудзіла яго да адміністратыўнага арышту.
Напярэдадні за тое ж самае “злачынства” актывіст АГП Віталь Гуляк, між іншым інвалід ІІ групы, пенсія якога складае 100 тыс. рублёў, быў аштрафаваны судзьдзёй Ланцэвіч на 600 тысяч рублёў.