Старшыня БАЖ сустрэлася з Хаўерам Саланам
«Для нас вельмі важна, каб у еўрапейскіх чыноўнікаў было разуменне, што любы дыялог, любыя пераўтварэнні ў краіне магчымыя толькі пры ўмове свабоды слова», — зазначыла Жанна Літвіна ў гутарцы з прэс-службай ГА «БАЖ» пасля заканчэння сённяшняй сустрэчы з генеральным сакратаром Рады Еўразвязу Хаўерам Саланам, які знаходзіцца з візітам у Мінску.
«Мы хочам, каб нармалізацыя стасункаў Еўропы з Беларуссю грунтавалася на рэальным паляпшэнні сітуацыі з мас-медыя ў нашай краіне», — падкрэсліла яна.
Сустрэча пачалася сёння ў 8.30 раніцы. Акрамя старшыні ГА «БАЖ», на яе былі запрошыня экс-кандыдаты ў прэзідэнты Аляксандр Мілінкевіч і Аляксандр Казулін, эканаміст Павел Данейка, лідэр дэмакратычных прафсаюзаў Аляксандр Ярашук, праваабаронцы Алег Гулак і Алена Танкачова.
«Спадар Салана падкрэсліў, што першая сустрэча, з якой пачаўся яго візіт у Мінск, — гэта сустрэча з прадстаўнікамі грамадзянскай супольнасці Беларусі, — распавяла Жанна Літвіна. — Гэта сведчыць, наколькі важнае іх меркаванне для далейшай пабудовы стасункаў Еўропы з Беларуссю».
