Забароненыя пікеты супраць АЭС

Гарадзенскі абласны суд не задаволіў касацыйную скаргу грамадскага актывіста з Астраўца Міколы Уласевіча, які не пагадзіўся з рашэннем мясцовых уладаў аб забароне на правядзенне шэрагу пікетаў супраць пабудовы атамнай электрастанцыі на тэрыторыі Астравецкага раёна.

Напрыканцы снежня мінулага года суд Астравецкага раёна палічыў адмову мясцовых уладаў цалкам абгрунтаванай, у сувязі з чым Мікола Уласевіч абскардзіў рашэнне ў судзе Гарадзенскай вобласці. Аднак, вышэйстаячая установа вырашыла, што парушэнняў заканадаўства ў забароне правядзення акцыі пратэсту супраць пабудовы няма, у сувязі з чым пакінула рашэнне суда Астравецкага раёна ў сіле. На думку самога Міколы Уласевіча, судовыя установы дзейнічаюць згодна з загадамі ўладаў і маюць на мэце перашкодзіць грамадскім актывістам праводзіць інфармацыйную кампанію супраць пабудовы АЭС на тэрыторыі Астравецкага раёна.

Адмову суда Гарадзенскай вобласці Мікола Уласевіч збіраецца абскардзіць у Вярхоўным судзе:калі усе судовыя установы будуць пройдзеныя і грамадскі актывіст не атрымае дазволу на правядзенне інфармацыйных пікетаў, ён разам са сваімі паплечнікамі збіраецца праводзіць несанкцыянаваныя акцыі пратэсту.