Мужчыны на продаж

2009 2009-01-14T16:11:00+0200 1970-01-01T03:00:00+0300 be

Міжнародная арганізацыя міграцыі зацікавілася праблемай гандлю мужчынамі. У дакладзе, падрыхтаваным экспэртамі арганізацыі, фігуруе і Беларусь. Беларускія мужчыны ўсё часьцей становяцца ахвярамі жорсткай працоўнай эксплюатацыі.

У дакладзе Міжнароднай арганізацыі міграцыі асаблівая ўвага надаецца гандлю мужчынамі з Украіны і Беларусі. На Беларусь прыпадае 17% усіх ахвяраў гандляроў “жывым таварам мужчынскага полу”. (На Ўкраіну — 28%). Дасьледаваньне праводзілі незалежныя экспэрты на падставе апытаньняў пацярпелых. Мужчын зь Беларусі і Ўкраіны прадаюць у мэтах працоўнай эксплюатацыі ў асноўным на будаўнічыя аб’екты ў Расеі.

Супрацоўніца прадстаўніцтва Міжнароднай арганізацыі міграцыі ў Беларусі Натальля Жак пацьвярджае:

“У нас цяпер нашмат больш справаў па працоўнай эксплюатацыі. Іншая рэч, што іх вельмі цяжка расьсьледаваць, бо трэба ехаць у краіну прызначэньня і там зьбіраць інфармацыю. А для гэтага патрэбныя грошы”.

Будаўнік Раман зь вёскі Верамейкі Магілёўскай вобласьці ня раз езьдзіў на заробкі ў Расею. Вось што ён распавёў пра ўмовы працы:

“Быў працоўны дзень 12-14 гадзін, ніякіх выходных. Калі нас вэрбавалі на месяц, то трымалі па 2-3 месяцы, не давалі заробленыя грошы. Была сыстэма штрафаў. Напрыклад, за размову па мабільным тэлефоне — штраф 500 расейскіх рублёў. Жылі ў бараках, калі хто ў бараку закурыў — гэта яшчэ 500 рублёў на першы раз, на другі — 1 тысяча рублёў. Калі ня выйшаў на працу — 5 тысяч. Аднаму хлопцу з Крычава на нагу ўпала панэль, раздрабіла пальцы. Яго адразу ж разьлічылі і першым рэйсам адправілі ў Крычаў. Калі камусьці штосьці не падабалася, размова была кароткай: “Давайте, ребята, на историческую родину и там качайте свои права”.

У дакладзе Міжнароднай арганізацыі міграцыі адзначаецца, што некаторыя ахвяры, у асноўным непаўналетнія хлопчыкі, становяцца прадметам сэксуальнай эксплюатацыі. Гэта тычыцца ў асноўным Расеі. Некаторых выкарыстоўваюць як жабракоў. Беларусы ў гэтым разьдзеле пакуль не фігуруюць, кажа супрацоўніца прадстаўніцтва Міжнароднай арганізацыі міграцыі ў Беларусі Натальля Жак:

“Я сама бачыла гэтае дасьледаваньне. Там канкрэтна пра сэксуальную эксплюатацыю беларускіх мужчын ня пішацца. Гэта больш уласьціва Ўкраіне. Прынамсі, у нас яшчэ такой статыстыкі няма, хаця, як гаворыцца, дзе капнеш — там і знойдзеш. Проста, можа, мы яшчэ не дайшлі да гэтага, яшчэ не было такіх спраў і не было пацярпелых”.

Дасьледаваньне Міжнароднай арганізацыі міграцыі мае на мэце прыцягнуць увагу да небясьпек, якія чакаюць людзей, што наважыліся на нелегальную працоўную міграцыю.

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international