Падведзеныя вынікі фотаконкурсу Беларускага ДПЧ
11.12.2008.
Тэгі: 60 год прыняцця Дэкларацыі правоў чалавека.
Крыніца: .
У склад журы конкурсу ўвайшлі прадстаўнікі розных краін: Андрэй Бастунец — намеснік старшыні Беларускай асацыяцыі журналістаў; Тайда Харазовіч — дырэктарка Фундацыі CURE, Дом правоў чалавека ў Сараеве; Од Нербё — прафесійны фатограф, фотакарэспандэнт найбуйнейшай штодзённай газеты ў заходняй Нарвегіі, Bergens Tidende; Роан Джаясекера — рэдактар часопіса Index on Censorship, Дом правоў чалавека ў Лондане.
Перад міжнародным журы паўстала няпростая задача — выбраць з мноства выдатных здымкаў усяго толькі два.
У выніку працяглых дыскусій і абмеркаванняў, пераможцамі конкурсу сталіся:
1. У намінацыі «Найлепшае прафесійнае фота» — Андрэй Лянкевіч з працай «Жанчыны збіраюць журавіны» (Артыкул 23. 1. Усеагульнай дэкларацыі правоў чалавека: Кожны чалавек мае права на працу, на свабодны выбар працы, на справядлівыя і спрыяльныя ўмовы працы і на абарону ад беспрацоўя.):
«Жанчыны збіраюць журавіны» (Правы належаць А. Лянкевічу)
2. У намінацыі «Найлепшае аматарскае фота» — Вольга Тарасенка з працай «Дзіцё з мамай» (Артыкул 25.2. Усеагульнай дэкларацыі правоў чалавека: Мацярынства і маленства даюць права на асаблівае апекаванне і дапамогу. Усе дзеці, народжаныя ў шлюбе ці па-за шлюбам, павінны карыстацца аднолькавай сацыяльнай абаронай.):
«Дзіцё з мамай» (Правы належаць В. Тарасенка)
Для вызначэння пераможцаў улічваліся многія фактары, у тым ліку нестандартны падыход. «Да прыкладу, здымак Андрэя Лянкевіча адразу кідаецца ў вочы сваёй іроніяй: вядомы факт, што журавіны на Захадзе асацыююцца з рознымі кактэйлямі і здаровым ладам жыцьця», — дзеліцца сваімі ўражаннямі адзін з сябраў журы Роан Джаясекера.
Кожны з пераможцаў конкурсу атрымае прыз — паездку ў Вільню на двух чалавек на выходныя. Апроч гэтага, яшчэ 40 фатаграфій гэтых і іншых удзельнікаў конкурсу будуць уключаныя ў экспазіцыю «Правы чалавека праз аб’ектыў фотакамеры», якая распачнецца ў Беларускім ДПЧ ў Вільні ў студзені 2009 году.
Конкурс ладзіўся пры падтрымцы Міністэрства замежных спраў Літвы, Міністэрства замежных спраў Нарвегіі і Фундацыі Дамоў правоў чалавека (Нарвегія).
Навіны па тэме
11.12.2008 Акцыі праваабаронцаў выклікалі ў жодзінцаў выключна станоўчыя эмоцыі
11.12.2008 Жыхары Аршаншчыны радаваліся юбілейным асобнікам Дэкларацыі
11.12.2008 У Баранавічах акцыя праваабаронцаў – у моладзевым асяродку
11.12.2008 Алесь Бяляцкі: «У краіне, якая падпісала Дэкларацыю правоў чалавека, забараняюць яе раздаваць»
Дадаць камэнтар
Камэнтары
Камэнтароў да гэтага артыкулу няма
