Аблвыканкам хоча падняць раёнкі на «адпаведны часу ўзровень»

2008 2008-10-03T18:24:31+0300 1970-01-01T03:00:00+0300 be

Гомельскі аблвыканкам абавязаў абласное ўпраўленне ідэалагічнай работы штоквартальна праводзіць нарады па пытаннях удасканалення ідэйна-зместавага ўзроўню дзяржаўных газет рэгіёна, стварыць інтэрнет-партал «СМІ Гомельскай во­бласці», а таксама прыняць іншыя меры­ па павышэнні эфектыўнасці працы раёнак.

Пра гэта ў справаздачным матэрыяле з пасяджэння аблвыканкама паведаміла друкаванае выданне выканкама газета «Гомельская праўда» (№151 ад 27 верасня 2008 г.). Паводле публікацыі, на пасяджэнні разглядаліся два пытанні: гатоўнасць народнай гаспадаркі да асенне-зімовага перыяду і выкананне плану мерапрыемстваў па развіцці дзяржаўных друкаваных выданняў вобласці на 2007-2010 г.г.

На пасяджэнні прысутнічалі шэраг высокапастаўленых дзяржчыноўнікаў са сталіцы, у тым ліку начальнік упраўлення друкаваных СМІ і знешніх сувязяў Мінінфармацыі Уладзімір Матусевіч.

З аналізам працы дзяржаўных газет Гомельшчыны выступаў начальнік галоўнага ўпраўлення ідэалагічнай работы аблвыканкама Анатоль Каціла. У сваім выступе ідэолаг заявіў, што ў сённяшніх умовах «ўзмацнення канкурэнтнай барацьбы на рынку» раённым газетам трэба шукаць новыя падыходы і развіваць творчы патэнцыял.

Сваю ацэнку мясцовай дзяржаўнай прэсе даў таксама старшыня Гомельскага аблвыканкама Аляксандр Якабсон.

«Аналіз ідэйна-зместавага ўзроўню сведчыць аб недастатковай колькасці ўласных аналітычных артыкулаў, прысвечаных сацыяльна-эканамічнай сітуацыі. Кожная публікацыя павінна пабуджаць да дзеяння думку», — перадае словы кіраўніка вобласці «Гомельская праўда».

Сітуацыю з працоўнымі кадрамі ў СМІ Аляксандр Якабсон назваў «болевай кропкай», «як у АПК ці сферы аховы здароўя». Як паведамляецца ў гэтым жа артыкуле, за апошнія чатыры гады ў рэдакцыі раённых газет вобласці было накіравана 39 выпускнікоў факультэта журналістыкі Белдзяржуніверсітэта, а працаваць з іх засталіся толькі 5.

«Каб падняць газеты на новы, адпаведны часу ўзровень», старшыня Гомельскага аблвыканкама прапанаваў палепшыць матэрыяльна-тэхнічную базу рэдакцый газет.

Паводле прыведзеных у «ГП» звестак, сёння ў Гомельскай вобласці выходзіць 24 дзяржаўныя газеты, у якіх працуюць 387 чалавек. Па стане на 15 верасня бягучага года ўсе вакансіі ў рэдакцыях раёнак запоўненыя.

Між тым, па звестках службы маніторынгу БАЖ, на сёння ў Гомельскай вобласці не існуе ніводнай недзяржаўнай грамадска-палітычнай газеты. З 7 незалежных выданняў, якія выходзілі на Гомельшчыне ў перыяд з 1995 па 2005 год, большасць спыніла сваю дзейнасць з прычыны адміністратыў перашкод — у прыватнасці, адмоў друкаваць газеты з боку мясцовых друкарань.

 
Даведка службы маніторынгу ГА «БАЖ»:
Газета «Гомельская думка» — выходзіла ў Гомелі з 1999 па 2001 г.г.
Газеты «Вольны час» — выходзіла ў Гомелі з 2001 па 2005 г.г.
«Школьная газета» (выданне журналісцкіх класаў гомельскай сярэдняй школы №44) — выходзіла з 1995 па 2000 г.г.
Газета «Рабочы Палесся» (рэгіянальны дадатак да газеты «Рабочы») — выходзіла на працягу 18 месяцаў, з 1999 па 2000 год.
Газета «Регион-вести» — выходзіла ў Светлагорску з 1999 па 2004 г.г.
Газета «Мозырская неделя» — выходзіла ў Мазыры з 5 жніўня 1994 па 1999 г.г.
Газета «Праспект» — выдавалася ў Гомелі з 1998 па 2005 г.г.

 

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international