На Высоцкага ў памежнікаў ёсьць інструкцыя

24.09.2008. Тэгі: перасьлед, дэмакратычны актывіст, выезд за мяжу.
Крыніца: Радыё «Свабода».

Лідэра незарэгістраванай Партыі Свабоды Сяргея Высоцкага памежнікі высадзілі зь цягніка на беларуска-ўкраінскай мяжы і адпусьцілі пасьля таго, як пратрымалі некалькі гадзінаў у дзяжурнай частцы.

Палітычнаму дзеячу не патлумачылі, чаму ён стаў невыязным.

Улетку яго некалькі разоў дапытвалі ў справе выбуху 4 ліпеня. Пазьней Высоцкі ўзяў у МУС даведку, што яго зьнялі з уліку, і ён мае права выяжджаць за межы Беларусі.

Сёньня памежнікі патлумачылі спадару Высоцкаму, што маюць інструкцыю, паводле якой яго забаронена выпускаць за межы краіны. Яму паставілі ў пашпарт пячатку пра тое, што ён невыязны.

Сяргей Высоцкі лічыць, што дзеяньні памежнікаў парушаюць ягоныя правы на вольнае перасоўваньне. Ён таксама сказаў, што будзе скардзіцца ў вышэйшыя інстанцыі.