Сітуацыя перад выбарамі накаляецца

2008 2008-09-17T13:12:00+0300 1970-01-01T03:00:00+0300 be

Выбаркамы пачалі выносіць папярэджанні дэмакратычным кандыдатам, друкарні адмаўляюцца вырабляць іх агітацыйныя матэр’ялы, некаторыя кандыдаты з адзінага спісу АДС самі здымаюцца з выбарчай гонкі.

 

Кандыдату ў дэпутаты па Мінскай Масюкоўшчынскай выбарчай акрузе №103 Дзянісу Садоўскаму акруговы выбаркам за адзін дзень вынес адразу два папярэджанні – за заклік на сустрэчу з Аляксандрам Мілінкевічам і за распаўсюд незалежнай газеты "Народная воля" з надрукаваным пра самога Садоўскага матэр’ялам.

 

Кандыдату ў дэпутаты ад АДС па Цэнтральнай акрузе Магілёва Аляксандру Сілкову акругам вынес папярэджанне за плакат, прыбіты цвіком да сцяны жылога дома. Плакат быў сфатаграфаваны невядомым чалавекам і перададзены ў камісію.

 

Гарадзенцу Вадзіму Саранчукову папярэджанне было вынесена за плакаты, якія распаўсюдзіла Партыя БНФ з ягоным прозвішчам. У акруговай камісіі палічылі, што гэтыя агітацыйныя матэрыялы надрукаваныя не за дзяржаўныя сродкі, якія выдзяляюцца кожнаму кандыдату ў дэпутаты на выбарчую кампанію. Плакаты "Партыя БНФ за сацыяльныя гарантыі", "За еўрапэйскі выбар для Беларусі", "За свабодны рынак" былі расклееныя ў абласным цэнтры.

 

Вадзім Саранчукоў лічыць, што акруговая камісія не мела рацыі, калі выносіла яму папярэджанне, бо, з яго меркавання, партыя ў любы час можа свабодна прапанагдаваць свае ідэі. Вадзім Саранчукоў з’яўляецца кандыдатам ў дэпутаты па Гарадзенскай Занёманскай акрузе №49.

 

А вось яшчэ адзін кандыдат Гарадзеншчыны з адзінага спісу Аб’яднаных дэмсілаў Станіслаў Суднік з Партыі БНФ напісаў заяву аб зняцці сваёй кандыдатуры. Ён балатаваўся ў Лідскай акрузе №54.

 

У намесніка старшыні Аб’яднанай грамадзянскай партыі Яраслава Раманчука ўзніклі праблемы з выступамі на гарадзенскіх прадпрыемствах. Ён балатуецца ў Гарадзенскай-Паўночнай акрузе №51, дзе ёсць буйны прамысловы раён.

 

Па словах Раманчука, "мы звярнуліся на ўсе прадпрыемствы, але пакуль ніводнае прадпрыемства, на жаль, не адказала станоўча на жаданне паразмаўляць з кандыдатам у дэпутаты. А яшчэ зараз падчас расклейкі абвестак пра маю сустрэчу з выбарцамі – пра прэзентацыю маёй кнігі быў затрыманы чалец маёй каманды".

 

Не друкуюць матэр’ялы

 

Што да Аб’яднанай грамадзянскай партыі ўвогуле, то яе кандыдаты зусім могуць спыніць свой удзел у выбарчай гонцы. Гэта звязана з тым, што беларускія друкарні адмаўляюцца вырабляць агітацыйныя матэр’ялы кандыдатаў ад АГП.

 

"380 тысяч выбаршыкаў у акругах, дзе балатуюцца па Мінску кандыдаты ад Аб’яднанай грамадзянскай партыі, атрымалі ўлёткі і іншыя інфармацыйныя матэр’ялы ад кандыдатаў са спісу ўлады, але не могуць пачытаць нашы інфармацыйныя матэр’ялы па банальнай прычыне: мы не можам іх надрукаваць", - заявіў старшыня АГП Анатоль Лябедзька.

 

Па словах палітыка, праблемы ўзніклі пасля таго, як Цэнтравыбаркам умяшаўся ў справу барысаўскай друкарні, забараніўшы вырабляць газетны фармат інфармацыйных матэр’ялаў некалькіх кандыдатаў ад АГП. Пасля быццам бы дазвол быў атрыманы, але матэр’ялы, якія кандыдаты мусілі забраць з друкарні яшчэ ў аўторак, дагэтуль не гатовыя.

 

"Мы пасля гэтага звярнуліся ў Мінск. Пяць ці шэсць друкарань альбо адразу, калі даведваліся, хто гэта, казалі “не”, альбо бралі наш заказ, пагаджаліся надрукаваць нашы матэр’ялы, але потым ператэлефаноўвалі і казалі, што могуць надрукаваць пасля 28 верасня, за што ім “вялікая ўдзячнасць".

 

Як адзначыў Анатоль Лябедзька, пры ўзніклых абставінах не выключаецца варыянт зняцця кандыдатаў ад АГП з выбараў.

 

"Мы абмяркоўваем сітуацыю, наколькі нам патрэбны ўдзел у такой выбарчай кампаніі".

 

Галоўнае – падлік галасоў

 

На думку палітолага Валерыя Карбалевіча, ні перашкоды з друкам агітацыйных матэр’ялаў, ні нават разгон мірнай акцыі ў Мінску 16 верасня сур’ёзна не адаб’юцца на ацэнцы выбарчай кампаніі з боку міжнародных назіральнікаў.

 

"Я не думаю, што гэтыя асобныя факты неяк паўплываюць на агульны малюнак. Калі што і паўплывае на ацэнку назіральнікаў АБСЕ, то гэта падлік галасоў – як многа акругаў будуць лічыць галасы без назіральнікаў, не дапусцяць назіральнікаў да таго, каб наглядаць за падлікам галасоў. Вось гэта найбольш сутнаснае".

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international