Пракуратура ў збіцці Яны Паляковай парушэнняў закона не ўгледзела
Салігарчанка Яна Палякова звярнулася ў пракуратуру горада з заявай аб узбуджэнні крымінальнай справы ў дачыненні капітана Пугачова, які ў складзе міліцэйскай групы прымусова даставіў яе ў РАУС, дзе ў адным з кабінетаў яе збілі.
Надзорны орган, у асобе следчага пракуратуры Салігорскага раёна Д.Дзешука, ва ўзбуджэнні крымінальнай справы адмовіў. Падчас дзесяцісуткавага разгляду пракурорскі следчы знайшоў аж восем сведак-міліцыянераў, якія сцвярджалі, што ў дзень збіцця Яны Паляковай (31 жніўня) з 9 раніцы да 10 вечара разам з капітанам Пугачовым знаходзіліся на цэнтральнай плошчы.
Абвергнуць факт знаходжання пацярпелай у будынку РАУС у пракурорскага следчага не атрымалася: два экіпажы машын хуткай дапамогі бачылі яе там і аказвалі медыцынскую дапамогу. Аднак следчы Дзяшук знайшоў яшчэ аднаго сведку - міліцыянера па прозвішчы Сасукевіч, паводле сведчання якога Яна Полякова прыйшла ў райаддзел сама. Каля дзяжурнай часткі РАУС ён, аказваецца, быў у адзіным ліку, цялесных пашкоджанняў на Паляковай не бачыў. Сведчанні дзяжурнага па РАУС пракурорскі следчы ў матэрыяле аб адмлве не прыводзіць.
Следчы Дзяшук піша, што па просьбе Паляковай да яе быў выкліканы псіхолаг. І гэта ў той час, калі да лекара-псіхіятра Яну Палякову накіравалі прымусова. Не згадвае пракурорскі следчы і аб міліцэйскім лейтэнанце Трубчыку, які прымчаўся ў бальніцу і спрабаваў там дапытаць пацярпелую.
Следчы Дзяшук ацаніў цялесныя пашкоджанні пацярпелай, нанесеныя капітанам Пугачовым і яго калегамі, як лёгкія, якія не пацягнулі за сабой кароткачасовага растройства здароўя.
Нагадаем, Яна Палякова з'яўлялася сябрам ініцыятыўнай групы па вылучэнні Вольгі Казулінай кандыдатам у дэпутаты заканадаўчага органа.
"Праваабаронцы за свабодныя выбары"
