Адказчыкамі па справе аб «экстрэмісцкіх матэрыялах» праходзяць 9 чалавек

2008 2008-09-18T13:31:07+0300 1970-01-01T03:00:00+0300 be

­Сёння раніцай у судзе Кастрычніцкага раёна Гродна адбылася папярэдняя сустрэча бакоў па грамадзянскай справе «Аб прызнанні інфармацыйных матэрыялаў экстрэмісцкімі». Як высветлілася ў судзе, адказчыкамі па справе выступаюць 9 асобаў, у якіх у апошнія гады на мяжы вымалі «патэнцыйна экстрэмісцкую» прадукцыю.

Пра гэта паведаміў прэс-службе ГА «БАЖ» адзін з адказчыкаў, гродзенскі журналіст Анджэй Пісальнік, якога выклікалі ў суд з-за асобніка газеты беларускіх палякаў «Glos znad Niemna na uchodzstwie», забранага ў яго мытнікамі ў 2006 годзе.

Усіх адказчыкаў па чарзе запрашалі ў залу суда для размовы. Акрамя суддзі Аляксандра Сіцько, там прысутнічаў прадстаўнік Гродзенскага абласнога УКДБ Іван Стойлік, а таксама супрацоўнік мытнай службы.

Анджэй Пісальнік адразу ж папрасіў для азнаямлення матэрыялы справы, якая называецца «Аб прызнанні інфармацыйнага матэрыялу экстрэмісцкім».

«Я спадзяваўся знайсці там хоць нейкія тлумачэнні, доказы, канкрэтныя прыклады, але нічога не было. Адзіны дакумент, які я там пабачыў, — гэта “­Заключэнне аб аглядзе друкаванага выдання «Glos znad Niemna na uchodzstwie»”, падпісанае намеснікам УКДБ па Гродзенскай вобласці А.А. Манкевічам. Ім “устаноўлена, што ў газеце размешчаны артыкулы на польскай мове, якія тэндэнцыйна асвятляюць унутраныя праблемы Рэспублікі Беларусь, а таксама ўтрымліваюць прыкметы распальвання варожасці па палітычных матывах”. На гэтай падставе Манкевіч робіць выснову, што ў газеце ўтрымліваецца “інфармацыя з прыкметамі экстрэмісцкай скіраванасці”», — распавёў А. Пісальнік.

Адзінае пытанне, якое суддзя задаў журналісту, — ці пагаджаецца ён з выстаўленымі да выдання прэтэнзіямі. «Я адказаў, што ўвогуле не разумею іх сутнасці — у заяве няма ніякіх доказаў таго, што нейкі змест газеты з’яўляецца экстрэмісцкім. Суддзя звярнуў на гэта ўвагу прадстаўніка КДБ, каб той гэта ўлічыў потым. Я сказаў, што падрыхтую пісьмовае пярэчанне, і суддзя даў мне тэрмін да 25 верасня», - паведаміў журналіст.

А. Пісальнік будзе хадайнічаць аб спыненні вытворчасці па справе. Пакуль жа суддзя прызначыў пачатак судовых слуханняў на кастрычнік.

(Працяг матэрыялу рыхтуецца)

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international