Берасце: Выбарчыя участкі не падрыхтаваныя да выбараў

Адсутнасць наглядных агітацыйных матэрыялаў на некаторых выбарчых участках горада Берасця сведчыць пра непадрыхтаванасць камісій да выбараў.

Адпаведна Каляндарнаму плану па падрыхтоўцы і правядзенні выбараў 28 верасня 2008 года, выбарчыя участкі павінны быць падрыхтаванымі за 14 дзён да выбараў. Гэта значыць, што з 13 верасня 2008 года стэнды з інфармацыйнымі матэрыяламі пра кандыдатаў у дэпутаты ў Палату прадстаўнікоў Нацыянальнага сходу РБ чацвёртага склікання павінны быць аформленыя.

У Берасці на выбарчым участку для галасавання № 1, які размяшчаецца ў інтэрнаце фабрыкі “Надзея”, няма агітацыйных плакатаў кандыдатаў. Пры наведванні участка для галасавання выбарчая камісія не працавала ў вызначаны час. На пытанне грамадзяніна “Чаму камісія зачыненая?” камендант інтэрнату адказала, што калі некаму камісія патрэбна, то побач знаходзіцца некалькі камісій, якія зараз працуюць.

На выбарчым участку № 33 таксама адсутнічаюць патрэбныя для працы выбарчай камісіі матэрыялы - такія як наглядныя агітацыйныя плакаты з інфармацыяй пра кандыдатаў, спісы складу выбарчых камісій.

“Правабаронцы за свабодныя выбары”