Пакараныя ў “справе 14-ці” фактычна пад хатнім арыштам

2008 2008-09-04T10:17:52+0300 1970-01-01T03:00:00+0300 be

Пакараныя ў “справе 14-ці” пачалі станавіцца на ўлік, каб адбываць абмежаваньне волі за арганізацыю масавых беспарадкаў, якія нібыта мелі месца падчас акцыі пратэсту прадпрымальнікаў 21 студзеня. Згодна з прадпісаньнем, умовы пакараньня блізкія да хатняга арышту.  Старшыня моладзевай камісіі Беларускай сацыял-дэмакратычнай партыі Алесь Стральцоў наведаў сёньня міліцыю Цэнтральнага раёну. Там яму ўручылі некалькі папераў, у якіх выкладзеныя правілы адбыцьця пакараньня.

Нагадаем: улады абвінавацілі 14 чалавек у арганізацыі масавых беспарадкаў, якія нібыта мелі месца 21 студзеня падчас акцыі прадпрымальнікаў. Андрэя Кіма абвінавацілі яшчэ ў пагрозе міліцыянту 10 студзеня. Суд у два этапы пакараў 13 чалавек. Уладзімера Сяргеева і Антона Койпіша штрафам, а астатніх актывістаў – абмежаваньнем волі на розныя тэрміны. Адбываць пакараньне яны будуць па месцы жыхарства.

Алесь Стральцоў паведаміў “Свабодзе”:

“На практыцы гэта азначае, што я не магу наведваць кватэры іншых людзей. Я не магу наведваць выставы і, увогуле, ніякія культурна-масавыя мерапрыемствы, ня кажучы ўжо пра палітычныя. Я не магу звольніцца з працы на ўласнае жаданьне. Калі ў мяне няма працы – а цяпер у мяне яе няма – то я абавязаны цягам 15 дзён яе знайсьці, або мне загадаюць куды пайсьці працаваць. Адмовіцца будзе нельга.

Я маю толькі адну гадзіну, каб схадзіць у краму ці яшчэ куды мне трэба. Не магу пакідаць без дазволу межы свайго населенага пункту. Ну, яшчэ я не магу недзе пунктаў зь дзясятак. Гэта фактычна хатні арышт”.

Прадпрымальнік Міхась Субач атрымаў прадпісаньне 2 верасьня:

“Канешне, я не лічу сябе вінаватым. Што тычыцца тых умоваў, у якіх я буду адбываць пакараньне, то тут нават мой сябар прыйшоў да мяне і запытаўся ці маю я права хадзіць на рынак. Але я й сам дакладна пакуль ня ведаю. Трэба будзе спытаць. Мае сваякі спакойна паставіліся, бо яны ўжо крыху прызвычаіліся”.

Міліцыянты некалькі разоў тэлефанавалі Алесю Чарнышову і пагражалі прымусова даставіць яго ў аддзел міліцыі.

“Сёньня чарговы раз патэлефанавалі з Цэнтральнага РУУС. Патрабуюць, каб я прыйшоў і стаў на афіцыйны ўлік. Дамовіліся, што я пайду да іх у панядзелак і стану на ўлік”, – паведаміў Алесь Чарнышоў.

Калі пакараныя двойчы парушаць правілы адбыцьця пакараньня, іх могуць накіраваць у папраўчыя калёніі, дзе яны будуць рэальна пазбаўленыя волі.

Менскі суд пакінуў прысуд у сіле. Засталася яшчэ адна інстанцыя – Вярхоўны суд, але ніхто з пакараных ня верыць, што прысуд будзе скасаваны.

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international