АДС адкладае рашэнне аб ўдзеле ў выбарах да 21 верасня

2008 2008-08-31T22:54:00+0300 1970-01-01T03:00:00+0300 be

31 жніўня Палітычная Рада Аб’яднаных дэмакратычных сілаў пастанавіла адкласці да 21 верасня рашэнне аб далейшым удзеле АДС у парламенцкай выбарчай кампаніі. Нагадаем, што напярэдадні Сойм Партыі БНФ прыняў рашэнне, што кандыдаты ад БНФ павінны зняцца з выбараў 23 верасня. Але пазіцыя БНФ не знайшла падтрымкі бальшыні суб’ектаў АДС.
Тры гадзіны ў штаб-кватэры БНФ працягвалася дыскусія на паседжанні Палітычнай Рады АДС.
Сутыкнуліся два пункты гледжання на далейшую стратэгію апазіцыі ў выбарчай кампаніі – альбо ўжо зараз аб’явіць пра зняццё сваіх кандыдатаў, альбо пакінуць акно магчымасцяў адчыненым і даць сябрам кааліцыі розныя варыянты рашэння.
“Адзіны варыянт зламаць існуючую сістэму, паўплываць на сітуацыю – гэта зняцца” – пераконваў прысутных Павал Севярынец. Аднак некаторыя кандыдаты ў дэпутаты выказваліся ў тым сэнсе, што іхняе зняцьцё з выбараў будзе здрадай тым людзям, якія працавалі ў іх камандах, і тым выбарцам, якія за іх падпісаліся.
Лідэр Аб'яднанай грамадзянскай партыі Анатоль Лябедзька асаблівую ўвагу звярнуў на неабходнасць прыняць агульнае кансалідаванае рашэнне ўсімі суб’ектамі дэмакратычнай кааліцыі, і ў гэтым сэнсе трошкі папракнуў БНФ і Партыю камуністаў, якія ўжо прынялі ўласныя партыйныя рашэнні наконт удзелу ў выбарах. “Калі мы развалім АДС, у нас не будзе палітычнай перспектывы” – заявіў Лябедзька, пакрэсліўшы, што такое развіццё падзеяў будзе на руку найперш уладам.
Лідэр Партыі камуністаў Сяргей Калякін у размове з карэспандэнтам Радыё Свабода адхіліў сцверджанні, нібыта камуністы ўжо вырашылі ісці да канца на гэтых выбарах, незалежна ад рашэння іншых сябраў кааліцыі. Вось як ён пракаментаваў прынятую заяву АДС:
“Калі прымаецца амаль што без зменаў рашэнне, аўтарам якога я быў, я не магу быць не задаволены. Тут усё ёсць – і вельмі жорсткая ацэнка выбарчага працэсу, і дзеянняў ўладаў. Тут ёсць і пацверджанне таго, што мы ўжо сёння не прызнаем, што гэтыя выбары адпавядаюць дэмакратычным стандартам, і заклік да міжнароднай супольнасці іх не прызнаваць. Мы не зачыняем дзвярэй, мы кажам уладам, што можна ўсё паправіць, калі дадаць нашых людзей у камісіі.
Мы не кажам, што ўсё ўжо вырашана – мы адчыняем акно магчымасцяў да ўсіх. А па-другое, мы пакідаем за сабой права прыняць адпаведнае рашэнне 21 верасня. Калі мы будзем бачыць, што ёсць падставы не працягваць удзелу у выбарах, то мы такое рашэнне прымем. І наконт таго, што камуністы ўжо прынялі для сябе канчатковае рашэнне – гэта не так”.
Расклад сілаў у АДС прадэманстравалі вынікі галасавання. За прыняты праект заявы, распрацаваны прэзідыўмам Палітрады, галасавалі 25 чалавек, супраць -- два, шасцёра ўстрымаліся. Прапанова Паўла Севярынца, каб заявіць, што 23 верасня дэмакратычныя сілы здымаюць усіх сваіх кандыдатаў, набралі ўсяго 4 галасы.
Апошні, галоўны пункт заявы гучыць наступным чынам: Рада АДС “склікае 21 верасня паседжанне Палітрады АДС для разгляду пытання аб спыненні далейшага ўдзелу Аб’яднаных дэмакратычных сілаў у выбарчай кампаніі”.
Даволі красамоўным было і гэтак званае рэйтынгавае галасаванне сярод кандыдатаў у дэпутаты. Яны пайменна адказвалі на пытанне, ці падтрымліваюць яны рашэньне. З 51 апытанага толькі 8 выказаліся за тое, каб зараз заявіць пра зняццё сваіх кандыдатураў, астатнія падтрымалі прыняты варыянт заявы АДС. Супраць неадкладнага зняцця сваіх кандыдатур выказваліся нават некаторыя кандыдаты ад Партыі БНФ.

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international