КДБ вяртае журналістам кампутары

2008 2008-08-26T16:44:11+0300 1970-01-01T03:00:00+0300 be

Журналісты недзяржаўных СМІ ў рэгіёнах атрымліваюць з КДБ адабраныя сёлета ў красавіку дакумэнты і кампутары.

Ахвярамі ператрусаў і допытаў сталі тады амаль 20 чалавек.

Сёньня журналістка з райцэнтру Бяроза на Берасьцейшчыне Тамара Шчапёткіна паведаміла “Свабодзе”, што яе кампутар, які ўвесну адабралі спэцслужбы -- зноў на звыклым месцы:

“Усё вярнулі. Прывезьлі ў хату. Я дзеля гэтага езьдзіла нават у пракуратуру Менску, каб асабіста прывезьці дазвол бярозаўскім супрацоўнікам КДБ і аддаць ім у рукі. І толькі праз два дні пасьля гэтага атрымала свой кампутар”.

Ператрусы 27 сакавіка прайшлі ў кватэрах амаль 20 рэгіянальных журналістаў. Падставай быў ордэр, выдадзены па старой справе пра сатырычныя мультфільмы пра Лукашэнку. Ордэр падпісаў намесьнік пракурора Менску Аляксей Стук. У мінулым чэрвені ён атрымаў падвышэньне па службе — працуе цяпер намесьнікам генэральнага пракурора. Пракамэнтаваць на просьбу “Свабоды” тую ранейшую справу ён адмовіўся.

Гаворыць намесьнік старшыні Беларускай асацыяцыі журналістаў, юрыст Андрэй Бастунец:

“БАЖ зьвяртаўся і ў Менскую, а таксама ў Генэральную пракуратуру і КДБ. Мы зьвярталі ўвагу на беспадстаўнасьць гэтых ператрусаў і канфіскацыі тэхнікі ды дакумэнтаў. Было відавочна: пракуратура ня мела ніякіх аргумэнтаў на тое, што нейкія рэчы, якія маюць дачыненьне да абразы Лукашэнкі, знаходзяцца ў гэтых журналістаў”.

БАЖ, як кажа Андрэй Бастунец, ужо дапамог 11 журналістам вярнуць з КДБ іхныя рэчы. Аднак сустракаюцца і выпадкі адмовы. Сьведчыць рэдактар Алесь Белы з Баранавічаў:

“На мае скаргі, а я напісаў ужо некалькі лістоў, адказы такія: “Вывучым пытаньне і пасьля вернем”. Аднак вывучэньне гэтае чамусьці зацягнулася”.

Пра прычыны перасьледу і канфіскацыі рэчаў у журналістаў і ня толькі ў іх разважае менскі палітык Сяргей Альфер:

“Забіралі для таго, каб ускладніць працу журналістаў. Але, як высьвятляецца, праца ідзе, як і раней. Таму сэнсу трымаць гэтае абсталяваньне ў сябе не было. Зь іншага боку, назіраецца такая тэндэнцыя — мы пакажам міжнароднай супольнасьці, што ў Беларусі дэмакратыі больш, чым ва ўсіх краінах, разам узятых. Ну, таму і вернем абсталяваньне ды іншыя рэчы”.

Сяргей Альфер таксама нагадаў, што 25 сакавіка 2006 году на мытні аэрапорту “Менск-2” беларускія спэцслужбы на мяжы сканфіскавалі грошы ў яго, а таксама ў Яраслава Раманчука, Андрэя Саньнікава і Вольгі Карач. Усе яны тады вярталіся з-за мяжы з сэмінару. Толькі праз восем месяцаў палітыкі дамагліся вяртаньня грошай.

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international