Зарэгістравана ініцыятыўная група Леаніда Аўтухова

Акруговая камісія разглядзела першаю заяву, якую падаў старшыня Гарадоцкай арганізацыі Партыі БНФ, актывіст Руху Леанід Аўтухоў, і цалкам задаволіла яе.

21 ліпеня адбылося паседжанне акруговай камісіі па Віцебскай сельскай акрузе па выбарах у Палату прадстаўнікоў. Камісія разглядзела першаю заяву, якую падаў старшыня Гарадоцкай арганізацыі Партыі БНФ Леанід Аўтухоў. Заява пададзена у адпаведнасці з патрабаваннямі Выбарчага кодэксу і не выклікала пытанняў у выбарчай камісіі.

Камісія аднагалосна зарэгістравала ініцыятыўную групу па вылучэння кандыдатам у дэпутаты Палаты прадстаўнікоў Леаніда Аўтухова. Леанід Аўтухоў – старшыня Гарадоцкай арганізацыі Партыі БНФ, актывіст Руху “За Свабоду!” звольнены з працы па палітычных матывах у красавіку 2008 году. Леанід актыўна змагаецца за рэалізацыю правоў грамадзян, адстойвае права карыстацца дзяржаўнай беларускай мовай, усталяваў Крыж “Змагарам за Свабоду”, арганізоўваў сустрэчы з беларускімі пісьменнікамі, выдае газету “Да перамогі!”.

Склад ініцыятыўнай групы складае 28 чалавек. Сярод іх вядомыя у краіне асобы Уладзімір Арлоў, Аляксандр Мілінкевіч, Хрыстафор Жэляпаў, Кастусь Смолікаў, таксама прадстаўнікі Віцебска, Гарадка, Шуміліна. З 22 ліпеня ініцыятыўная група мае права всці збор подпісаў па вылучэнню Леаніда Аўтухова кандыдатам у дэпутаты.

Пакуль іншыя прэтэндэнты на дэпутацтва свае заявы дзеля вылучэння кандыдатам праз збор подпісаў у выбаршчыкаў не падалі у камісію.