Берасьце: K. Сумар патрабуе роўных магчымасьцяў для ўсіх кандыдатаў і недапушчэньня прымусовага датэрміновага галасаваньня

На паседжаньні прэзідыуму Брэсцкага аблвыканкама і Савета дэпутатаў па пытаньні зацьверджаньня акруговых камісій па выбарах дэпутатаў у Палату прадстаўнікоў Нацыянальнага Сходу Рэспублікі Беларусь старшыня Брэсцкага аблвыканкама Канстанцін Андрэевіч Сумар адзначыў: "Галоўная мэта, якую мы ставім перад сабой, - правесьці выбары максімальна адкрыта, строга ў рамках выбарчага заканадаўства і Канстытуцыі нашай краіны, зрабіць іх максімальна празрыстымі. Мы будзем рабіць усё магчымае адносна выкананьня заканадаўства, каб прыняць і задаволіць усе тыя заяўкі і прапановы, якія будуць паступаць ад грамадскіх аб'яднанняў і партыйных структураў, а таксама кандыдатаў у дэпутаты.

Нам ні ў якім выпадкам ня трэба шукаць падставу для таго, каб пазбавіцца ад кандыдата ў дэпутаты, калі з яго боку няма сур'ёзных парушэньняў, зьвязаных з крымінальнымі эканамічнымі злачынствамі. Мы зачынім вочы на дробязі і ня будзем рабіць з іх далёкаідучых высноў. Жадалася б, каб на гэтым паседжаньні ўсё зразумелі, што мы не павінны шукаць "блыхаў" у кандыдатаў у дэпутаты. Іньшымі словамі, нам варта даць максімум магчымасьцяў для таго, каб дазволіць зарэгістравацца ўсім жадаючым вылучацца ў Парламент.

Мы павінны зрабіць усё неабходнае, каб на выбарчых участках былі створаныя аптымальныя ўмовы для захаваньня законнасьці і дысцыпліны, роўныя магчымасьці для ўсіх кандыдатаў.

Я ня ведаю, якім раней было становішча ў Брэсцкай вобласці, але па рэспубліцы ў мінулыя гады было шмат прыкладаў парушэньняў у друку. Наша задача - зрабіць усё неабходнае, каб усе кандыдаты ў дэпутаты атрымалі аднолькавыя магчымасьці ў падрыхтоўцы агітацыйных матэрыялаў. Мы падрыхтуем дакумент, які рэгламентуе своечасовую падрыхтоўку бюлетэняў і ўлётак для ўсіх кандыдатаў, не падзяляючы іх на "правых" і "левых".

Ні ў якім разе нельга стымуляваць людзей да датэрміновага галасаваньня. Як адзначыў Прэзідэнт Рэспублікі Беларусь А.Г. Лукашэнка, раней грамадзян рэспублікі прымушалі галасаваць датэрмінова. Такога больш дапушчаць нельга”.

“Праваабаронцы за свабодныя выбары”