Віцебшчына: Фармаваньне акруговых камісяў прайшло ў паўзакрытым рэжыме

2008 2008-07-15T11:41:33+0300 1970-01-01T03:00:00+0300 be Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»

Фармаваньне акруговых камісіяў па выбарах у дэпутаты Палаты прадстаўнікоў на Віцебшчыне прайшло ў паўзакрытым рэжыме. На сумеснае паседжаньне аблвыканкама і прэзідыюма аблсавета не дапусьцілі ні недзяржаўных журналістаў, ні проста грамадзянаў Рэспублікі Беларусь. Міліцыянтам-ахоўнікам далі два спісы прозьвішчаў людзей, якія ўдзельнічалі ў паседжаньні ці якім было дазволена прысутнічаць у зале. З прадстаўнікоў прэсы запрашэньне наведаць мерапрыемства атрымалі карэспандэнты Віцебскага абласнога тэлерадыёкамітэту, БелТА і двух выданьняў аблвыканкама і аблсавета – газэтаў “Віцебскі рабочы” ды “Народнае слова”.

 

Дакладны час паседжаньня, якое, дарэчы, распачалося толькі а 16-ай гадзіне, высьветліць было цяжка. Чыноўнікі ўхіляліся ад адказаў на адпаведныя пытаньні актывістаў дэмакратычных партыяў. У выніку жадаючыя папрысутнічаць на фармаваньні акруговых камісіяў вымушаныя былі з’явіцца на пачатку працоўнага дня і чакаць, калі ж ім дакладна скажуць пра час мерапрыемства.

 

На паседжаньне прыехалі прадстаўнік БХК Васіль Бераснеў з Воршы і карэспандэнт газэты “Товарищ” Мікалай Петрушэнка з Коханава. Таксама хацелі папрысутнічаць на мерапрыемстве незалежны журналіст і праваабаронца Валеры Шчукін і – у якасьці прадстаўніка грамадскасьці – незалежны журналіст Вадзім Баршчэўскі. Былыя дэпутаты Вярхоўнага Савета СССР М.Петрушэнка і ВС Рэспублікі Беларусь Валеры Шчукін абыйшлі шмат кабінетаў, каб атрымаць дазвол трапіць на паседжаньне, але ў выніку атрымалі адмову. Чыноўнікі спачатку спасылаліся на адсутнасьць у іх заданьняў ад канкрэтных СМІ, а пасьля таго, як па факсу такое заданьне было падцьверджаным, – на адсутнасьць афіцыйнай акрэдытацыі пры аблвыканкаме і аблсавеце.

 

Пасля гэткай адмовы заставалася толькі напісаць скаргу ў Кнігу заўваг і прапаноў, якая пасля ваганьняў была ўсё ж такі прад’яўленай. Скаргу ад імя ўсіх, каго не дапусьцілі, напісаў М.Петрушэнка.

 

Вельмі цяжка было даведацца і пра вынікі фармаваньня камісіяў, бо працоўны дзень скончыўся, і тэлефоны чыноўнікаў маўчалі.

 

У 14 акруговых камісіяў Віцебскай вобласьці, агульны склад якіх – 182 чальцоў, трапілі 18 прадстаўнікоў палітычных партыяў. З іх 2/3 складаюць чальцы прапрэзідэнцкіх Аграрнай партыі і КПБ. Са спісу АДС ўвайшлі па 2 прадстаўніка БСДП (Грамада) і ПКБ ды адзін сябра ПБНФ. А менавіта Наталля Качанава – БСДП (Г), Чыгуначная №1; Міхаіл Гіль – БСДП (Г), Пастаўская №29; Любоў Шчадрова – ПКБ, Полацкая №28; Сцяпан Белы – ПКБ, Сенненская №30; Васіль Саланенка – ПБНФ, Глыбоцкая №22. акрамя таго па партыйнаму спісу АГП у склад камісіі быў уключаны Юдаў – Мёрская №24.

 

Як лічаць экперты, тое, што ў складзе акруговых камісіяў будуць прадстаўнікі апазыцыі, аніякай ролі не адыграе, бо галоўныя маніпуляцыі адбываюцца на ўчастках.

 

“Праваабаронцы за свабодныя выбары”

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international