Улады распачынаюць жорсткія рэпрэсіі супраць тых, хто адкрыта заявіў пра намер праводзіць маніторынг выбараў у Парламент.

27.06.2008. Тэгі: суды, адміністратыўная справа, праваабаронцы, выбары-2008.

Адразу па 2 артыкулах адміністрацыйнага кодэксу 27 чэрвеня быў пакараны сябар БХК, праваабаронца з Маладэчна, адзін з удзеньнікаў маніторынгу за выбарамі ў Палату прадстаўнікоў Нацыянальнага сходу Рэспублікі Беларусь Эдуард Баланчук. Справа разглядалася у судзе Маскоўскага раёну Менска суддзём Харкевічам.

Учора Баланчук быў затрыманы супрацоўнікамі міліцыі і КДБ каля офісу БХК, дзе мела адбыцца нарада па маніторынгу за выбарамі. На Эдуарда Баланчука былі складзены 2 пратаколы: непадпарадкаваньне законнаму распараджэньню ці патрабаваньню службовай асобы пры выкананьні ім службовых паўнамоцтваў (арт 23.4 КаАП) і дробнае хуліганства (арт 17.1 КаАП).

Сёньня суд, прыняўшы да ўвагі паказаньні сьведкаў з боку прадстаўнікоў праваахоўных органаў і праігнараваўшы паказаньні сьведкаў з боку абвінавачваемага, пакараў Баланчука 10 суткамі арышту і грашовым штрафам у памеры мільён пяцьдзесят тысяч рублёў.

Зразумела, што такім чынам, улады распачынаюць рэпрэсіі супраць беларускіх праваабаронцаў, якія адкрыта заявілі пра намер праводзіць маніторынг маючых адбыцца выбараў у межах дзеючага заканадаўства.

На жаль, апошнія гучныя заявы прадстаўнікоў улады і Цэнтрвыбаркаму пра дэмакратызацыю і празрастасьць выбарчага працэсу засталіся толькі голай дэкларацыяй. Першыя факты грубага ўціску на праваабаронцаў сведчаць аб тым, што рэжым не жадае мяняць сваю антыдэмакратычную і антынародную афарбоўку.