Праваабаронцы за свабодныя выбары

12.06.2008. Тэгі: заявы, выбары-2008.

Па папярэдняй інфармацыі Цэнтральнай камісіі па выбарах і правядзенні рэспубліканскіх рэферэндумаў, чарговыя выбары дэпутатаў Палаты прадстаўнікоў Нацыянальнага сходу Рэспублікі Беларусь адбудуцца 28 верасня 2008 года. У сувязі з гэтай значнай палітычнай падзеяй у жыцці нашай краіны мы, беларускія праваабаронцы, заяўляем, што заўсёды выступалі і выступаем за свабодныя і справядлівыя выбары, правядзенне якіх здолела б умацаваць давер грамадзянаў да новаабранага прадстаўнічага органа дзяржаўнай улады, паспрыяла б развіццю дэмакратыі ў краіне.

Кіруючыся дадзенай пазіцыяй, мы распачынаем маніторынг выбараў, які будзе адбывацца на падставе аналізу ўсіх этапаў выбарчай кампаніі. Аналіз будзе адбывацца на падставе інфармацыі праваабаронцаў з усіх рэгіёнаў Беларусі.

Ацэнка этапаў выбарчага працэсу будзе ажыццяўляцца сыходзячы з іх адпаведнасці выбарчаму заканадаўству Беларусі і міжнародным стандартам, выканання прынцыпаў транспарэнтнасці, свабоды і справядлівасці выбарчага працэсу. Пра вынікі маніторынгу будуць праінфармаваныя беларуская грамадскасць і міжнародная супольнасць.

У сваёй працы мы адкрытыя да супрацоўніцтва з усімі дзяржаўнымі і недзяржаўнымі арганізацыямі, а таксама асобамі, зацікаўленымі ў правядзенні свабодных, справядлівых і дэмакратычных выбараў.

Алег Гулак, старшыня РПГА “Беларускі Хельсінкскі Камітэт”

Алесь Бяляцкі, праваабаронца, віцэ-прэзідэнт Міжнароднай Федэрацыі Правоў Чалавека

Тэлефон для даведак і ўдакладненняў: +375 44 7256490