Вячаслава Сіўчыка арыштавалі на 10 сутак

2008 2008-06-05T14:17:58+0300 1970-01-01T03:00:00+0300 be

Суддзя суда Мінскага раёна Вячаслаў Тулейка 4 чэрвеня прысудзіў да 10-сутачнага адміністрацыйнага арышту старшыню секцыі "Мемарыял" Беларускага добаахвотнага таварыства аховы помнікаў гісторыі і культуры Вячаслава Сіўчыка на падставе артыкула 23.34 КоАП (парушэнне парадку арганізацыі або правядзення масавага мерапрыемства або пікетавання).

В.Сіўчык абвінавачаны ва ўдзеле ў несанкцыяваным мерапрыемстве — падвядзенні вынікаў фотаконкурсу беларускай службы "Радыё Свабода" ("Маё фота — мае Курапаты"), якое прайшло ва ўрочышчы 3 чэрвеня.

Супрацоўнікі Мінскага РУУС затрымалі В.Сіўчыка ў Курапатах напярэдадні цырымоніі памінання ахвяраў сталінізму ў сувязі з 20-годдзем адкрыцця свету трагедыі ўрочышча. Невядомы ў цывільным, які назваўся намеснікам начальніка РУУС па прозвішчы Грыб, даў слова гонару афіцэра, што В.Сіўчык будзе дастаўлены назад ва ўрочышча. Аднак гэтага не адбылося. Ноч палітык правёў у ізалятары часовага ўтрымання Мінскага РУУС.

На думку намесніка старшыні секцыі "Мемарыял" Уладзіміра Раманоўскага, арышт В.Сіўчыка сведчыць аб тым, што сістэма "аднаўляе тэхналогіі расправы з людзьмі 70-гадовай даўніны".

23 красавіка В.Сіўчык быў прыгавораны судом Старадарожскага раёна Мінскай вобласці да 15 сутак адміністрацыйнага арышту на падставе артыкула 23.34 КоАП. Асуджэнне В.Сіўчыка было звязана з падзеямі 19 красавіка, калі з ініцыятывы мемарыяльнай секцыі таварыства аховы помнікаў у вёсцы Дражна Старадарожскага раёна быў устаноўлены і асвечаны шасціканцовы крыж святой Ефрасінні Полацкай у памяць аб 25 мірных жыхарах, забітых членамі 2-й Мінскай партызанскай брыгады 15 красавіка 1943 года. Імёны загінулых пералічаны на мемарыяльнай шыльдачцы, прымацаванай да крыжа. У цырымоніі адкрыцця мемарыяльнага знака бралі ўдзел і відавочцы трагедыі. Праз некалькі дзён паводле рашэння мясцовых уладаў памятны крыж быў дэмантаваны і перавезены на тэрыторыю царквы вёскі Залужжа, што размяшчаецца на адлегласці некалькіх кіламетраў ад Дражна. //БелаПАН

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international