Спецслужбы працягваюць цікавіцца дзейнасьцю "Маладога Фронту"

30.04.2008. Тэгі: Малады Фронт, КДБ.
Крыніца: Прэс-служба «Маладога Фронту».

Гомельскі дарожна-будаўнічы каледж, у якім навучаецца актывіст мясцовага Маладога Фронту Жуковіч Кірыл, наведалі супрацоўнікі КДБ.

Па словах Кірыла, куратарку яго групы падрабязна распыталі пра палітычную дзейнасьць маладафронтаўца, як ён праводзіць вольны ад вучобы час, з кім з гомельскіх дэмакратычных актывістаў мае зносіны. Акрамя гэтага, куратарцы паказвалі фотаздымкі Кірыла і яго сяброў, зробленыя на палітычных акцыях і прасілі паказаць знаёмых асоб. На дзіва, самога Кірыла супрацоўнікі КДБ не дапытвалі. Пасьля гэтага візыту Кірылу Жуковічу паведамілі, што ён будзе стаяць на асабістым уліку ў дырэктара і ў яго могуць узьнікнуць праблемы зь інтэрнатам.

Кіраўнік Гомельскай Філіі Маладога Фронту Андрусь Цянюта лічыць, што, ціснучы на актыўных маладзёнаў, спэцслужбы стараюцца перашкодзіць разьвіцьцю і ўзбуйненьню мясцовай філіі.