Больш за чатыры тысячы гарадзенскіх прадпрымальнікаў прыняло ўдзел у акцыі пратэсту

2005 2005-02-10T10:00:00+0200 1970-01-01T03:00:00+0300 be Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»

Больш за чатыры тысячы гарадзенскіх прадпрымальнікаў прыняло ўдзел у акцыі пратэсту супраць увядзення падатку на даданую вартасць. Прадпрымальнікам удалося прарвацца на цэнтральную плошчу горада. Там адбыліся перамовы паміж удзельнікамі акцыі і старшынём Гарадзенскага гарвыканкама Аляксандрам Антоненкам. Пасля гэтага людзі разышліся.

Як паведамляе газэта ПАГОНЯ, збор удзельнікаў акцыі пратэста быў абвешчаны дэмакратычным рухам “Гарадзенскі выбар” у парку Жылібера а 11-ай гадзіне. Ужо за поўгадзіны да акцыі на тэрыторыі парка былі сцягнуты ўзмоцненыя нарады міліцыі. Дзеяннямі міліцыі асабіста кіраваў намеснік начальніка Упраўлення ўнутраных справаў Гарадзенскага аблвыканкама Юрый Чабанаў. Міліцыянты заклікалі людзей “разысціся і не парушаць заканадаўства Рэспублікі Беларусь”.

Калі пратэстуючых сабралося больш за тры тысячы яны рушылі ў бок цэнтральнай плошчы горада. Дарогу ім перагарадзілі шэрагі АМАПаўцаў і салдатаў унутраных войскаў. Пасля некалькіх хвілінаў тузаніны прадпрымальнікі здолелі прарваць міліцэйскія кардоны і выйсці на плошчу Леніна. Тут да ўдзельнікаў акцыі пачалі далучацца прадпрымальнікі, якія не здолелі прайсці ў парк Жылібера. У гэтыя хвіліны агульная колькасць удзельнікаў пратэста перавысіла чатыры тысячы чалавек.

“Свабоду!”, “Далой НДС!” скандавалі прадпрымальнікі. Да людзей выйшаў старшыня Гарадзенскага гарвыканкама Аляксандар Антоненка.

– Гэта не нашыя паўнамоцтвы адмяняць ПДВ. Гэта рэспубліканскі ўзровень. Праз нашых гарадзенскіх дэпутатаў мы будзем ініцыяваць адмену гэтых патрабаванняў, – заявіў Аляксандар Антоненка.

Прадпрымальнікаў цікавіў лёс лідара дэмакратычнага руху “Гарадзенскі выбар” Дзмітрыя Іваноўскага, якога ўчора спрабавалі затрымаць супрацоўнікі міліцыі. Антонека запэўніў, што ўлады горада не зробяць нічога, што выходзіла б за межы закона. Пасля перамоваў ён сышоў. У след яму прадпрымальнікі пачалі крычаць “Далой НДС!”, “Далой НДС!”

Праз паўтары гадзіны мітынг скончыўся. Калі людзі пачалі разыходзіцца невядомыя ў цывільным зрабілі некалькі спробаў затрымаць найбольш актыўных удзельнікаў акцыі. Але прадпрымальнікам удалося адбіць сваіх сяброў. На момант падрыхтоўкі артыкула інфармацыі пра тое, ці былі усё ж затрыманыя – няма.

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international