Заснавальнік «Новой газеты Сморгони» прыгавораны да зняволення

28.01.2005.

pahonia.promedia.by

Суд Гарадзенскай вобласці пакінуў у сіле прысуд заснавальніку “Новой газеты Сморгони” Рамуальду Улану. Гэта азначае, што цягам бліжэйшых дзён ён будзе накіраваны ў адну з папраўча-працоўных установаў Беларусі.

26 снежня 2003 года Рамуальд Улан, едучы на аўтамабілі, збіў веласіпедыстку. Жанчына атрымала цяжкія цялесныя пашкоджанні. Р.Улан выплаціў ёй матэрыяльныя і маральныя страты і на судзе жанчына прасіла “не караць яго сурова”. Судом Смаргонскага раёна Улан быў прыгавораны да аднаго года пазбаўлення волі з адбываннем пакарання ў калоніі-пасяленні. Суд Гарадзенскай вобласці разгледзеў касацыйную скаргу, што падаваў Рамуальд Улан, і пакінуў у сіле рашэнне першай інстанцыі.

– Вельмі сумна. У мяне былі спадзяванні, што суд адменіць гэты прысуд. У мяне ёсць заключэнні экспертаў, якія сведчаць на маю карысць. На жаль, іх не ўзялі пад увагу, – сказаў ПАГОНІ Рамуальд Улан.

Ён падрыхтаваў скаргу ў наглядную інстанцыю. Але спадзяванні, што пракуратура ці Вярхоўны суд стануць на бок заснавальніка незалежнага выдання, якое шмат крыві папсавала ўладам, практычна роўныя нулю.

– Я цяпер сяджу на чамаданах, цягам бліжэйшых пяці-шасці дзён за мною прыйдуць міліцыянты, – гаворыць Рамуальд Улан.

Рамуальд Улан быў заснавальнікам вельмі паспяховага незалежнага мясцовага выдання “Новая газета Сморгони”. У лепшыя часы наклад “НГС” у некалькі разоў перавышаў наклад дзяржаўнай “раёнкі”. Гарадзенскімі ўладамі газета была знішчана. Улан прыкладаў усе намаганні, каб яе адрадзіць. Аднак пасля вынясення абвінаваўчага прысуду, адраджэнне незалежнага выдання стала немагчымым.