За спробу віншаваньня з дзём народзінаў Аляксандра Казуліна - у пастарунак

26.11.2007. Тэгі: акцыі, затрыманьні, палітвязьні, Казулін.
Крыніца: Прэс-служба АГП.

25 лістапада ў Дзень народзінаў палітвязьня Аляксандра Казуліна актывісты моладзевага крыла партыі АГП запланавалі правесьці акцыю салідарнасьці ў падтрымку апазіцыйнага палітыка, а таксама нагадаць, што Беларусь - апошняя краіна на еўрапейскай прасторы, дзе ўтрымліваюцца палітвязьні.

Як паведаміў намесьнік старшыні "Маладых дэмакратаў" Міхась Пашкевіч, акцыя адмыслова нідзе не афішавалася і рыхтавалася сіламі арганізацыі, тым ня менш супрацоўнікі праваахоўных органаў даведаліся пра яе, і на момант пачатку акцыі на Кастрычніцкай плошчы ўжо знаходзілася некалькі дзясяткаў людзей у цывільным.

Міхася Пашкевіча затрымалі, калі ён пачаў даставаць з пляцака партрэты палітвязьняў. Разам з ім затрымалі Міхася Крывога і Сяргея Клюева, Канстанціна Сіманкова. Астатніх удзельнікаў груба выціснулі з Кастрычніцкай плошчы.

Затрыманых даставілі ў Цэнтральны РУУС, дзе пратрымалі больш за дзьве гадзіны, пасьля чаго адпусьцілі без складаньня пратаколаў. Расьцяжку "Свабоду Казуліну" канфіскавалі.