Старшыню КДБ просяць ушанаваць памяць рэпрэсаваных

2007 2007-09-28T17:48:09+0300 1970-01-01T03:00:00+0300 be Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»

27 верасня кіраўнікі грамадскага аргкамітэта па ўвекавечанні памяці ахвяр сталінскіх рэпрэсій накіравалі ліст старшыне Камітэта дзяржбяспекі Юрыю Жадобіну з просьбай дазволіць ускладанне кветак да будынка ўнутранай турмы КДБ у Менску, дзе ў ноч з 29 на 30 кастрычніка 1937 года былі расстраляныя каля 100 чалавек.

Ліст падпісалі сустаршыні аргкамітэта – геолаг Радзім Гарэцкі, гісторык Ігар Кузняцоў і пісьменнік Васіль Якавенка.

У лісце адзначаецца, што 2007 год знамянальны знакавай падзеяй – 70-годдзем кульмінацыі масавых палітычных рэпрэсій у СССР. "Набліжаецца дзень, калі ў турме НКВД у Менску пасля катаванняў былі расстраляныя каля сотні дзеячаў культуры, прадстаўнікоў дзяржаўнага апарата і ЦК КП(б)Б, у тым ліку шмат пісьменнікаў і журналістаў. Наш аргкамітэт з гэтай нагоды праводзіць шэраг урачыста-жалобных мерапрыемстваў і мае намер у Дзень памяці 29 кастрычніка прынесці кветкі да так званай "Амерыканцы", дзе ў ноч з 29 на 30 кастрычніка 1937 года была ажыццёўленая вышэйназваная акцыя", – гаворыцца ў лісце.

Яго аўтары спадзяюцца, што кіраўніцтва КДБ дазволіць групе грамадзян прайсці да будынка турмы з кветкамі і свечкамі для выканання памінальнага акту. У склад групы ўваходзяць інжынер Уладзімір Раманоўскі і педагог Надзея Тарасевіч, народжаныя ў ГУЛАГу, былыя рэпрэсаваныя Надзея Дзямідовіч, Сяргей Кардаш, Уладзімір Святлоў, Вячаслаў Станішэўскі і Сяргей Ханжанкоў, а таксама пісьменнікі і нашчадкі рэпрэсаваных Алена Кобец-Філімонава, Леанід Маракоў і Васіль Якавенка.

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international