Калі ты сеў на ровар – ты апазіцыянер!
Сённяшняй раніцай на вуліцах Новаполацка міліцэйскія машыны з “мігалкамі” пераследавалі людзей на веласіпедах.
Падставай, як лічуць мясцовыя актывісты, стала інфармацыя пра маючы адбыцца велапрабег “За свабоду Казуліну”. Але афіцыйнай прычынай у гарадскім аддзеле ўнутраных спраў называюць пошук скрадзеных двухколых машынаў. Правяраюць нумары, высвятляюць, хто, калі і дзе набыў свой ровар. Адначасова бяруць тлумачэнні, куды і навошта ехалі.
Паводле актывіста Антона Ясіновіча, пасля таго, як людзі напісалі тлумачэнні, іх, напэўна, адпускаюць. Але дакладна ён не ведае, бо сам разам з Валерам Шаўчэнкам, Юрыем Бельскім і Ігарам Сухарукавым яшчэ знаходзіцца ў пастарунку. Ніякай атрыбутыкі, плакатаў альбо спецыяльных маек на веласіпедыстах не было.
У старшыні полацкай філіі БСДП (Грамада) Альберта Маркава, якога таксама затрымалі на дарозе, нешта шукаюць у легкавіку.
