Беларускія салдаты паедуць у гарачыя пункты?

22.08.2007. Тэгі: грамадства, войска, міратворчыя сілы.
Крыніца: Хартыя'97.

Генсек Арганізацыі дамовы аб калектыўнай бяспецы Мікалай Бардзюжа разлічвае, што рашэнне аб стварэнні міратворчых сіл АДКБ будзе прынята ўжо гэтай восенню.

Паводле яго слоў, плануецца стварыць кантынгент, які будзе дзейнічаць як у зоне адказнасці арганізацыі, так і за яе межамі пад эгідай ААН.

Бардзюжа нагадаў, што 6 кастрычніка ў Душанбэ пройдзе пасяджэнне Савета калектыўнай бяспекі, на якім кіраўнікам краін?удзельніц АДКБ будзе прадстаўлены дакумент, які прадугледжвае стварэнне падобных міратворчых сіл, паведамляе «Інтэрфакс».

Нагадаем, членам гэтай арганізацыі з’яўляецца і Беларусь. Кіраўнік камісіі па міжнародных справах і нацыянальнай бяспецы Савета рэспублікі Мікалай Чаргінец паведаміў «Еўрарадыё», што з’яўляецца прыхільнікам стварэння такіх міратворчых сіл:

«Я не супраць утварэння такіх сілаў, якія б пад эгідай ААН маглі выконваць міратворчую місію»

Чаргінец зазначыў, што ў Беларусі няма такога заканадаўства, якое б забараняля ўдзельнічаць у міратворчым кантынгенце. Такім чынам, беларускія салдаты дзеля навядзення міру могуць трапіць у месцы ваеннага канфлікту:

«Гэта не баявыя кропкі, а кропкі нестабільнасці, дзе патрэбная міратворчая дзейнасць. Гэта, канешне, зона рызыкі, але калі ААН прымае падобнае рашэнне, Беларусь гатовая ўдзельнічаць»