Дзеці і жонка Валерыя Леванеўскага адмовіліся даваць паказаньні
25.06.2004.
24 чэрвеня ў Ленінскую пракуратуру Горадні выклікалі дзяцей і жонку Валерыя Леванеўскага — для дачы паказаньняў у якасьці сьведкаў па крымінальнай справе аб публічнай абразе прэзыдэнта Лукашэнкі. Абвінавачанымі па гэтай справе зьяўляюцца сам кіраўнік страйкаму прадпрымальнікаў краіны і ўдзельнік Еўрапейскай Кааліцыі “Свабодная Беларусь” Валеры Леванеўскі, які сядзіць у гарадзенскім сьледчым ізалятары, і ягоны намесьнік Аляксандар Васільеў.Сьледчы пракуратуры паведаміў Леванеўскім, што яны могуць адмовіцца даваць паказаньні супраць сваіх сваякоў. І ўсе яны: сыны Валерыя — Зьміцер, Уладзімер, дачка Кацярына і жонка Марына выкарысталі гэтую магчымасьць і даваць паказаньні адмовіліся.
Зьміцер і Ўладзімер Леванеўскія два тыдні таму падавалі ў пракуратуру пісьмовую просьбу аб спатканьні з бацькам, але дазволу пакуль не атрымалі. Сьледчы Альфрэд Танкевіч таксама ня даў хлопцам канкрэтнага адказу на пытаньне, калі такая сустрэча можа адбыцца. Дагэтуль спатканьне з мужам у сьледчым ізалятары мела толькі Марына Леванеўская, нагадвае Радыё Свабода.
Дадаць камэнтар
Вы павінны зарэгістравацца альбо ўвайсьці ў сыстэму , каб мець магчымасьць пакідаць камэнтары
Камэнтары
Камэнтароў да гэтага артыкулу няма
