viasna on patreon

Да 5,5 гадоў калоніі: пракуроры запрасілі тэрміны для пятай часткі абвінавачаных па справе аб "масавых беспарадках" у Брэсце

2021 2021-10-20T18:07:50+0300 2021-10-20T18:07:52+0300 be https://spring96.org/files/images/sources/27protesty_brest_den_vtoroi_10082020_diadichkina_bg.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»
Брэст 10 жніўня. Фота: "Брэсцкая газета"

Брэст 10 жніўня. Фота: "Брэсцкая газета"

Як паведамляе "Брэсцкая Вясна", яшчэ 28 ліпеня ў Ленінскім судзе Брэста пачаўся працэс над пятай партыяй абвінавачаных па крымінальнай справе аб масавых беспарадках за падзеі 10 жніўня 2020 года. За час працэсу колькасць абвінавачваных вырасла з 13 да 19 чалавек: некаторых мужчын перамясцілі з іншых партый праз хваробу, таксама ў гэты працэс уключылі затрыманых падчас перасячэння мяжы з Літвой Руслана Волкава і Глеба Раманава. Усіх іх судзяць паводле ч. 2 арт. 293 Крымінальнага кодэкса.

Справу разглядае суддзя Аляксандр Семянчук

19 кастрычніка дзяржабвінавачванне запатрабавала наступныя пакаранні для ўдзельнікаў працэсу:

паводле двух артыкулаў — ч. 2 арт. 293 і ч. 3 арт. 205 КК ("крадзеж") — шляхам складання:

  • Шафарэнка Якаў — 5 гадоў 6 месяцаў калоніі ўзмоцненага рэжыму + штраф 100 базавых;
  • Філімонаў Станіслаў — 5 гадоў калоніі ўзмоцненага рэжыму + штраф 100 базавых.

паводле ч. 2 арт. 293 КК:

  • Пякач Яўген — 5 гадоў калоніі ўзмоцненага рэжыму (шляхам складання з неадбытай "хіміяй" у 1,5 года);
  • Целешман Аляксандр4 гады 6 месяцаў калоніі агульнага рэжыму;
  • Антонаў Марк, Верамей Ілля, Волкаў Руслан, Гарчанюк Ігар, Канцэвіч Філіп, Соўпель Іван, Трацюк Сяргей — па 4 гады калоніі ўзмоцненага рэжыму кожнаму;
  • Клімчук Арцём, Казлоўскі Віктар, Раманаў Глеб, Сідзюк Раман, Цяліпка Леў, Цімафееў Аляксандр, Хабавец Данііл — па 3 гады 6 месяцаў калоніі ўзмоцненага рэжыму кожнаму;
  • Мазько Павел3 гады 6 месяцаў агульнага рэжыму.

Што вядома пра судовы працэс?

10 жніўня Іван Соўпель купіў у рэстаране КФС два бургеры ў папяровым пакеце. Калі з боку супрацоўнікаў прыляцела святлошумавая граната, ён на эмоцыях кінуў гэты пакет. Таксама Соўпелю ставіцца ў віну тое, што ён падняў плітку і апусціў яе побач з сабой. Сваю віну мужчына не прызнае.

Таксама ў матэрыялах справы ёсць відэа ад 10.08.2020, паводле якога 19-гадовы Леў Цяліпка штосьці кідае, паводле версіі абвінавачвання, у бок міліцыянераў. На пасяджэнні хлопец распавёў, што ён тады проста стаяў і здымаў на тэлефон, пасля чаго яго пхнулі — тэлефон выпаў з рук і разбіўся; на эмоцыях хлопец у бок ад сябе кінуў чахол ад тэлефона, той праляцеў усяго пару метраў, а адлегласць да міліцыянераў была каля 50 метраў. Больш ніякіх дзеянняў Льву не інкрымінуецца, аднак абвінавачванне кваліфікуе ўчынак хлопца як "удзел у масавых беспарадках".

На адным з працэсаў Сяргей Трацюк заявіў, што 10 жніўня быў паранены. Ён ляжаў у лякарні, дзе яму перасаджвалі скуру (даведкі прадстаўлены суду). А судзяць яго за тое, што ён кінуў пластыкавую бутэльку нібыта ў бок супрацоўнікаў і падняў кавалак асфальта. Вядома, што з матэрыяламі справы Сяргей азнаёміўся толькі на судзе, у СІЗА такой магчымасці яму не далі.

Станіславу Філімонаву і Якаву Шафарэнку таксама ставяць у віну крадзеж 6 тон труб да снежня 2020. На судзе мужчыны тлумачылі, што трубы ляжалі іржавыя і зарослыя, побач з недабудаваным будынкам, дзе ўжо некалькі гадоў нічога не адбываецца і куды можна бесперашкодна трапіць. Таму яны палічылі трубы металаломам і пачалі здаваць іх у адпаведны пункт прыёму.

Нагадаем, у рамках справы пра так званыя "беспарадкі" 10 жніўня 2020 года ў Брэсце ўжо асуджана 46 чалавек. У суме яны атрымалі 171 год і 6 месяцаў зняволення.

Апошнія навіны

Партнёрства

Сяброўства