Міжнародная платформа для Беларусі асуджае затрыманне праваабаронцаў
Міжнародная платформа для Беларусі па прыцягненні вінаватых да адказнасці (IAPB) асуджае апошнія рэпрэсіі супраць грамадзянскай супольнасці і патрабуе неадкладнага вызвалення ўсіх палітычных затрыманых і зняволеных, якія ўтрымліваюцца з відавочнымі парушэннямі міжнароднага заканадаўства ў галіне правоў чалавека.
“З 14 ліпеня ў Беларусі былі затрыманыя прынамсі дзевяць праваабаронцаў, у офісах шырокага кола грамадскіх арганізацый і прыватных кватэрах асобных праваабаронцаў былі праведзены дзясяткі ператрусаў. Гэтыя маштабныя рэпрэсіі ў дачыненні да грамадзянскай супольнасці ў Беларусі з'яўляюцца чарговай спробай рэжыму Лукашэнкі здушыць іншадумства, абмежаваць асноўныя правы чалавека і спыніць законнае дакументаванне парушэнняў правоў чалавека. Гэтае дакументаванне неабходнае для прыцягнення вінаватых да адказнасці, і на гэты момант ужо зафіксавана больш за 2 000 выпадкаў сур'ёзных парушэнняў правоў чалавека.
Незалежна ад дзеянняў рэжыму, Платформа будзе працягваць дакументацыю сур'ёзных парушэнняў міжнароднага заканадаўства ў галіне правоў чалавека з мэтай садзейнічання забеспячэнню адказнасці вінаватых і правасуддзя для пацярпелых у Беларусі”.
Міжнародная платформа для Беларусі па прыцягненні вінаватых да адказнасці (IAPB) – гэта кааліцыя няўрадавых арганізацый на чале з DIGNITY, ПЦ “Вясна” і “Прававой ініцыятывай”. IAPB збірае, правярае і захоўвае інфармацыю, дакументы і доказы сур'ёзных парушэнняў правоў чалавека ў Беларусі са жніўня 2020 г. Платформу падтрымалі ўрады 21 дзяржавы.
