Пісьменніцу судзяць за абразу Лідзіі Ярмошынай Дапоўнена
Аляўціна Корчык. Фота з сацыяльных сетак.
У судзе Маскоўскага раёна Мінска 14 красавіка пачаўся разгляд крымінальнай справы ў дачыненні да дваццаціпяцігадовай Аляўціны Корчык, якую вінавацяць па артыкуле 369 Крымінальнага кодэксу (абраза прадстаўніка ўлады).
Аляўціна Корчык скончыла журфак БДУ, працуе тэхнічнай пісьменніцай і капірайтарам.
Па матэрыялах следства, жанчына, пра якую вядома што яна знаходзілася ў ІЧУ з 19 студзеня 22 студзеня, "30 кастрычніка, маючы намер зняважыць прадстаўніка ўлады, з мэтай прыніжэння гонару і годнасці, звязанай з электаральнай кампаніяй і кіруючыся нізкімі памкненнямі, у телеграм канале пакінула каментар наступнага зместу:
"Большай ш…й чым Ярмошына, усё роўна нікому не стаць".
Справу разглядае суддзя Лідзія Целіца. Дзяржабвінаваўца – пракурор Яўген Серакоў.
У судзе прагучала, што Аляўціна Корчык у тэлеграм-чаце "Міхалова-чат" адправіла паведамленне з непрыстойным зместам. Нібыта знервавалася, адбылася эмацыйная перапіска і яна пакінула зняважлівы каментар у дачыненні да старшыні ЦВК Лідзіі Ярмошынай.
На пытанне пракурора, чаму менавіта Ярмошына, адказала:
- Проста ўсплыло ў галаве, саму Ярмошыну я не мела на ўвазе.
Сваю віну Аліна ў судзе не прызнае.
Адвакат пытаецца ў Корчык:
- Вы тэхнічны пісьменнік, абазнаная ў лінгвістычных пытаннях, як вы ацэньваеце заключэнне эксперта?
- Эксперт выразна адказвае, што нельга расцэньваць дадзеную фразу як абразу.
Аляўціна Корчык прызналася ў судзе, што паказанні, якія давала пад час следства, былі дадзеныя пад псіхалагічным ціскам і прымусам супрацоўнікаў, што яе палохалі, што адвязуць на Акрэсціна. Абяцалі адпусціць адразу.
Пацярпелая Лідзія Ярмошына на суд не з’явілася, таксама не прышлі сведкі па справе.
Адвакат хадайнічаў аб выкліку ў суд Тамары Мезенцавай, якая рабіла экспертызу выказвання Аляўціны.
Суддзя адхіліла хадайніцтва аб выкліку эксперта.
Пракурор кажа, што віна Аляўціны прызнаная цалкам. У тэксце паведамлення ўказваецца канкрэтна прозвішча асобы, у дачыненні да якога была дапушчаная абраза.
Ён просіць пакараць Корчык абмежаваннем волі тэрмінам на два гады без накіравання ва ўстановы адкрытага тыпу.
У апошнім слове Корчык патлумачыла, што ў абвінавачвання ёсць свой кантэкст разумення справы. Кожны чалавек можа напісаць глупства. І я таксама чалавек. На жаль, я выкарыстала не самае ўдалае слова, якое было сказана ва узрушаных пачуццях.
У чат "Міхалова-чат" ўступала, каб пазнаёміцца з суседзямі, лагатып чата не яна выбірала. Не лічыць, што пакаранне павінна быць такім жорсткім за памылку, якую яна здзейсніла ўпершыню за 25 гадоў жыцця ў гэтай краіне.
Абвяшчэнне прысуду заўтра ў 15.00
