Бабруйчанку Галіну Юшкоўскую падазраюць у абразе супрацоўнікаў міліцыі

2021 2021-02-24T07:09:27+0300 2021-02-24T07:12:04+0300 be http://spring96.org/files/images/sources/jushkouskaja-babruisk.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»
Галіна Юшкоўская. Фота: Бабруйскі кур'ер.

Галіна Юшкоўская. Фота: Бабруйскі кур'ер.

У Бабруйску ўзбуджаная чарговая крымінальная справа за абразу працаўнікоў міліцыі (арт.369 КК): у пятніцу 19 лютага на працы ў канцы дня затрымалі Галіну Юшкоўскую, маці журналіста Яўгена Юшкоўскага, якога брутальна затрымлівалі ў жніўні 2020-га.

Галіну адвезлі ў Следчы камітэт, забралі тэлефон, пасля допыту даставілі ў ІЧУ, дзе жанчына правяла выходныя. Адпусцілі яе толькі ў панядзелак, 22 лютага, увечары. Жанчына не ведае, што будзе далей. Следчы, паводле Галіны, калі яе адпускалі, сказаў – чакайце.

Бабруйчанку падазраюць у напісанні абразлівых каментароў у адрас двух працаўнікоў бабруйскай міліцыі ў тэлеграм-канале. Самая Галіна сцвярджае, што ніколі не пакідала каментароў у тэлеграме, а з таго акаўнта, уласніцай якога яе палічылі бабруйскія міліцыянты.

Пра падрабязнасці затрымання і сутнасць абвінавачвання піша "Бабруйскі кур'ер".

Гісторыя пачалася яшчэ 27 лістапада. Тады жанчыну запрасілі на гутарку ў АУС Бабруйскага райвыканкама. Там паведамілі, што расследуецца крымінальная справа па арт. 369 Крымінальнага кодэкса Беларусі (Абраза прадстаўніка ўлады) і прад'явілі каментары ў тэлеграме ў адрас двух бабруйскіх супрацоўнікаў міліцыі, напісаныя з акаўнта з фатаграфіяй жанчыны ў сонцаахоўных акулярах, якая гэтым супрацоўнікам падалася падобнай на Юшкоўскую.

Галіна катэгарычна адмаўляе, што на фота - яна, а таксама сцвярджае, што тэлеграмам яна карыстаецца толькі для чытання навін і асабістай перапіскі, і наогул нідзе і ніколі не пакідала каментароў. Пра гэта яна сказала ў АУС.

Пасля ўзяцця тлумачэнняў жанчыну павезлі да яе дадому для агляду кватэры.

"Яшчэ заехалі да мяне на працу - я ж у міліцыю пайшла тады ў рабочай вопратцы, не ўзяла ні тэлефон, ні ключы, - успамінае лістападаўскія падзеі Галіна. - Дома яны паклікалі суседзяў у якасці панятых, проста агледзелі кватэру, забралі тэлефон на экспертызу. Я спакойна аддала яго, думаючы, што так з мяне канчаткова будуць знятыя ўсе падазрэнні і абвінавачванні, таму што спецыялісты ўжо сапраўды разбяруцца, што з майго тэлефона ніхто нічога не пісаў».

Павезлі ў Следчы камітэт прама з працы.

Галіне аддалі тэлефон 23 снежня. Жанчыне нічога не сказалі аб тым, ці закрытая крымінальная справа, што ўстанавіла экспертыза. Да 19 лютага бабруйчанка спакойна жыла ў поўнай упэўненасці, што міліцыя ва ўсім разабралася, і ўсе падазрэнні ў мінулым.

У пятніцу, 19 лютага, жанчына, як звычайна, знаходзілася на працы. Днём ёй патэлефанавалі з міліцыі і сказалі, што хочуць з ёй тэрмінова пагаварыць, прапанавалі пад'ехаць да яе на прадпрыемства да канца працоўнага дня. Галіна пагадзілася, паколькі адчувала сябе ў бяспецы, упэўненая, што ёй нічога не могуць прад'явіць, паколькі яна нікуды не хадзіла, ні ў чым не ўдзельнічала, а тая экспертыза тэлефона, мяркуючы па ўсім, нічога не паказала, таму што ёй тады вярнулі гаджэт, і адпусцілі.

Галіну з працы адвезлі  ў Следчы камітэт.

"Там зноў паднялі тую ж тэму - пра тыя ж каментары, - распавядае Галіна. - Я паўтарыла, што гэта не я, нагадала, што мяне ўжо дапытвалі ў лістападзе, вывучалі мой тэлефон. У гэты раз пасля ўзяцця тлумачэнняў мне прад'явілі пастанову аб маім затрыманні на 72 гадзіны – маўляў, мяне падазраюць у тым, што нейкага там кастрычніка а 19 гадзіне я напісала абразлівы каментар на адрас двух бабруйскіх міліцыянтаў».

Пасля гэтага следчыя, са слоў Галіны, зноў паехалі аглядаць яе кватэру, але ўжо без самой Галіны. Дома знаходзіўся муж бабруйчанкі. Падчас беглага агляду нічога не забралі, але ўзялі ў мужа пачак цыгарэт, якую ён папрасіў перадаць Галіне.

Каля 22 гадзін вечара галіну Юшкаўскую прывезлі ў ізалятар часовага ўтрымання. Там, перш чым адвесці ў камеру, правялі асабісты дагляд.

"Прыйшлося распрануцца цалкам, прысесці, - распавядае Галіна. - Так, гэта вельмі зневажальна, непрыемна, але я разумею, што такая працэдура, я спрабавала ўявіць, што гэта не са мной адбываецца. Запомнілася, што жанчына, якая праводзіць агляд, папрасіла даць ёй новыя пальчаткі, сказала, маўляў, я не буду гэтую нармальную жанчыну аглядаць у тых жа пальчатках, што і гэтых, яна мела на ўвазе жанчын, якія паступалі за крадзяжы»у стане алкагольнага ап'янення".

Сын бабруйчанкі - журналіст Яўген Юшкоўскі (яго жорстка затрымлівалі каля ІЧУ ў жніўні 2020 года) наняў для маці адваката. Разам з ім увечары ў панядзелак Галіна яшчэ раз пабыла ў Следчым камітэце, адкуль яе і адпусцілі, папярэдзіўшы, што, калі што - з ёй звяжуцца. Што рабіць і чаго чакаць далей - бабруйчанка не ведае. Кажа, што, па словах адваката, падстаў для яе затрымання ў Следчага камітэта не было.

Апошнія навіны

Партнёрства

Сяброўства