СУДОВЫЯ ВЫКАНАЎЦЫ АПІСАЛІ АБСТАЛЯВАННЕ РЭДАКЦЫІ ГАЗЭТЫ НАША СВАБОДА

2002 2002-08-01T10:00:00+0300 1970-01-01T03:00:00+0300 be Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»

31 ліпеня, а чацьвёртай гадзіне, у памяшканне, дзе месціцца рэдакцыя газэты НАША СВАБОДА нанеслі візіт чатыры судовых выканаўцы. Яны правялі тут выканаўчыя дзеянні па іску аб абароне гонару і годнасці старшыні Камітэту дзяржаўнага кантролю Анатоля Тозіка да НАШАЙ СВАБОДЫ. Была апісаная ўся маёмасць, што знаходзілася ў памяшканні рэдакцыі: кампутары, аргтэхніка і г.д. Падас падзеі прысутнічалі супрацоўнікі рэдакцыі і міліцыянты. Галоўны рэдактар выдання Павал Жук лічыць дзеянні судовых выканаўцаў незаконнымі, бо апісаная аргтэхніка знаходзіцца ў прыватнай кватэры й належыць прыватным асобам, а не рэдакцыі газэты. Цяпер уласнікам абсталявання прыдзецца даказваць, што арыштаваныя кампутары належаць не рэдакцыі газэты, а фізічным асобам. Пакуль апісаная маёмасць не забраная з рэдакцыі і ёй магчыма карыстацца па-прызначэнні. 1 жніўня павінен выйсці чарговы нумар НАШАЙ СВАБОДЫ.
Скончыўшы опіс маёмасці НАШАЙ СВАБОДЫ, судовыя выканаўцы накіраваліся да хаты да журналіста Міхаіла Падаляка, які таксама пазначаны ў якасці адказчыка па дадзенай справе: Тозік патрабуе спагнаць з НАШАЙ СВАБОДЫ 200.000.000 рублёў, а з журналіста – 15.000.000 рублёў. Дзеянні судовых выканаўцаў ажыццяўляюцца ў межах гэтак званых мерапрыемстваў па забеспячэнні іску: уласнасць адказчыкаў апісваецца яшчэ да таго, як пачаўся разгляд справы.
Адзначым, што ў дадзены момант у вытворчасці Савецкага суда г. Мінску знаходзіцца іск па абароне гонару і годнасці Аляксея Шыдлоўскага. Адказчыкам тут пазначаныя газэта Советская Белоруссія і яе рэдактар Павал Якуббовіч, справа знаходзіцца ў судзе ўжо месяц, але маёмасць адказчыкаў ніхто не апісваў, ніякіх выканаўчых дзеянняў адносна рэдакцыйнага абсталявання Советской Белоруссіі не ажыццяўлялася. Відавочна, што ў дадзеным выпадку мы маем яскравы прыклад палітычнага пераследу: Тозік падаў іск (а судовыя выканаўцы кінуліся хутка забяспечваць ягонае выкананне) пад уплывам апошніх заяваў прэзідэнта Лукашэнкі аб неабходнасці “разабрацца прававымі сродкамі з газэтамі, што распаўсюджваюць інфармацыю, дыскрэдытуючую дзчржаўных чыноўнікаў”. Гэтая справа ўкладаецца ў шэраг “журналісцкіх” справаў апошняга часу: ліквідацыя газэты “ПАГОНЯ”, крымінальны пераслед журналістаў ПАГОНІ і РАБОЧАГА, шматлікія адміністратыўныя штрафы да журналістаў, якія выступаюць у абарону свабоды слова – усё гэта знакі вайны, якую разгарнула дзяржава супраць незалежнай прэсы.
Сп. Тозік абураны з артыкула журналіста Міхаіла Падаляка "Канфідэнцыйна", у якім аўтар раскрыў "непрыхільныя" дачыненьні паміж кіраўніком Дзяржкантролю й генэральным пракурорам краіны Віктарам Шэйманам. А.Тозік заяўляе, што гэтыя зьвесткі ня толькі зьневажаюць ягоныя гонар, годнасьць і справавую рэпутацыю, але й "падрываюць аўтарытэт улады ў краіне". У артыкуле “Канфідэнцыйна”, які выклікаў абурэньне высокага чыноўніка, распавядаецца пра нябачную барацьбу пэўных груповак і асобаў у атачэньні Аляксандра Лукашэнкі. Аўтар матэрыялу, спасылаючыся на пэўныя дакладныя запіскі расейскіх спэцслужбаў, сьцьвярджаў сярод іншага, што Анатоль Тозік пісаў дакладныя запіскі на імя Аляксандра Лукашэнкі, крытыкуючы ў іх генэральнага пракурора Віктара Шэймана. Менавіта гэтае месца прыводзіць у сваім пазове Анатоль Тозік, называючы гэтыя цьверджаньні абразай свайго гонару. У зыскавай заяве сп. Тозік цьвердзіць, што, наадварот, прапрацаваўшы шмат гадоў разам з В.Шэйманам, ён лічыць генпракурора "кіраўніком высокага ўзроўню".
Але НАША СВАБОДА сцьвярджае, што дакумэнты, на якія яны спасылаюцца, існуюць, можна іх прад’явіць. Суду, каб засьведчыць іх, прыйдзецца рабіць запыт у расейскае ФСБ. Гэта, скажам так, апэратыўныя дадзеныя ад расейскага ФСБ. Але гэтыя дакумэнты ёсьць, і хай суд вырашае іхную адпаведнасьць.
”З КДК — ведамства Тозіка — штомесяц ідуць дакладныя запіскі аб стане справаў да прэзыдэнта. Яны праходзіць праз канцылярыю, там яны рэгіструюцца. Рэгістрацыйныя нумары ў нас ёсьць, мы можам запрасіць канцылярыю, каб яна іх паказала” – кажа рэдактар выдання Павал Жук. Між іншым, артыкул ніяк нельга лічыць ганебным для сп. Тозіка: ён там прадстаўлены як змагар за справядлівасць, які вядзе барацьбу супраць карупцыі ў вышэйшых эшэлонах улады і намагаецца таго, каб генпракуратура працавала лепшым чынам.
Працэс над НАШАЙ СВАБОДАЙ пачнецца ўжо ў наступную пятніцу, 2 жніўня. Вядзе справу судзьдзя Анатоль Савіч, які ў свой час паспрыяў закрыцці газэты НАВІНЫ, папярэдніцы НАШАЙ СВАБОДЫ: ён задаволіў шматмільярдны іск да гэтага выдання, пададзены ад ... таго самага Шэймана. Павал Жук у сваім каментары для радыё Свабода расцэньвае гэтыя акалічнасьці наступным чынам: “Зараз існуе замова, каб цалкам прыдушыць усю незалежную прэсу. Гэта факт. Мы бачым, як разьбіраліся з “Пагоняй”, як разьбіраюцца зараз з газэтай “Рабочы”, толькі закончыўся суд над “Народнай Воляй”, ну і зараз будзе суд з намі. Гэта ні што іншае, як замова найвышэйшай улады, каб прыдушыць незалежную прэсу”.
У выпадку задавальнення іску ў поўным аб’ёме, газэта НАША СВАБОДА будзе даведзеная да банкруцтва. Для беларускіх газэтаў 120 000 амерыканскіх даляраў – надзвычай вялікія грошы.
У нашай краіне зараз не проста небяспечна для газэты крытыкаваць уладу. Небяспечна нават узгадваць імя чыноўніка. Вайна супраць свабоды слова разгортваецца ўсё мацней.

Файлы

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international