Праваабарончы цэнтр «ВЯСНА»

Навіны за 14 сьнежня 2011

14.12.2011 Увага! Тэрміновая прэс-канферэнцыя

15 снежня прадстаўнікі беларускіх праваабарончых арганізацыяў і грамадскіх рухаў агучаць тэрміновы зварот да грамадскасці, звязаны з крымінальнай справай кіраўніка Праваабарончага цэнтра “Вясна” і віцэ-прэзідэнта Міжнароднай Федэрацыі за правы чалавека Алеся Бяляцкага. Прэс-канферэнцыя адбудзецца на офісе ПЦ “Вясна” (пр-т Незалежнасці, 78А-48). Пачатак – у 10:30.

14.12.2011 Фінскія праваабаронцы дбаюць пра лёс Алеся Бяляцкага і “Вясны”

13 снежня Фінская Ліга Правоў Чалавека наведала амбасаду Літвы ў Хельсінкі, каб перадаць пісьмовы зварот па справе Алеся Бяляцкага і сітуацыі ў Беларусі. Праваабаронцы таксама прасілі сустрэчы з амбасадай Расійскай Федэрацыі ў Хельсінкі, але адказу не атрымалі. У выніку зварот быў пакінуты ў паштовай скрыні амбасады. Трэці зварот быў накіраваны ў амбасаду Польшчы ў Фінляндыі.

14.12.2011 Украіна: Салідарнасць з палітвязнямі Беларусі (фота)

Моладзь ладзіць акцыі ў падтрымку беларускіх палітвязняў, а прадстаўнікі праваабарончых арганізацыяў Украіны прыцягваюць увагу грамадскасці да зняволення кіраўніка “Вясны” і віцэ-прэзідэнта FIDH Алеся Бяляцкага.

14.12.2011 Суд над Сяргеем Каваленкам чарговы раз перанесены

Віцебскага сябра КХП БНФ судзяць паводле відэа- і фотаматэрыялаў з інтэрнэту: паглядзеўшы відэаролік пра вывешваньне бел-чырвона-белага сцяга на даху крамы “5 элемент”, супрацоўнікі Кастрычніцкага РАУС склалі на Сяргея Каваленку адміністрацыйны пратакол. Прайшлі ўжо два судовыя пасяджэнні, чарговае адбудзецца 26 снежня.

14.12.2011 Сёння - Дзень памяці Андрэя Сахарава

Андрэй Сахараў пайшоў з жыцця 22 гады таму, 14 снежня 1989 года. Вядомы фізік, адзін са стваральнікаў савецкай вадароднай бомбы, самы малады на той час акадэмік (у АН СССР ён быў абраны ў 32 гады), у канцы 1960-х гадоў ён з'яўляўся адным з лідэраў праваабарончага руху ў Савецкім Саюзе.

14.12.2011 Працягваецца ціск на Мікалая Уласевіча

Ціск на грамадскага актывіста з Варнянаў Мікалая Уласевіча працягвае ўзмацняцца. На гэты раз невядомыя асобы распаўсюджваюць на тэрыторыі Ашмянскага і Астравецкага раёну ўлёткі-пасквілі, у якіх грамадскі актывіст усяляк паліваецца брудам.

14.12.2011 Рабочыя Магілёўскага домабудаўнічага камбіната дамагліся саступак адміністрацыі

Нагадаем, што ў кастрычніку гэтага года быў створаны страйкам, у склад якога ўвайшло шэсць чалавек. Ачоліў страйкам сябра Свабоднага прафсаюза металістаў. Рабочыя высунулі кіраўніцтву шэраг патрабаванняў, накіраваных на падвышэнне заробку, паляпшэнне бытавых умоваў і ўмоваў тэхнікі бяспекі, арганізацыі ўмоваў працы.

14.12.2011 Дзмітрый Канавалаў і Уладзіслаў Кавалёў не павінны быць пакараныя смерцю!

Міжнародная Федэрацыя за правы чалавека рэзка асуджае смяротныя прысуды, вынесеныя Дзмітрыю Канавалаву і Уладзіславу Кавалёву.

14.12.2011 Незалежныя прафсаюзы жорстка крытыкуюць уладу

У Менску пачаў працу 8 зьезд Беларускага кангрэсу дэмакратычных прафсаюзаў. Ён супаў па часе з 20-годзьдзем рэгістрацыі першага ў краіне вольнага прафаб’яднаньня — Незалежнага прафсаюзу гарнякоў Беларусі.

14.12.2011 Віншаванні палітвязням даслалі з Бялыніцкага раёна

Віншавальныя паштоўкі з надыходзячымі святамі Божага Нараджэння і Новага года, а таксама лісты са словамі падрымкі адаслалі па пошце ўсім беларускім палітвязням 14 снежня дэмакракратычныя актывісты з Бялыніцкага раёна Магілёўскай вобласці.

14.12.2011 У Віцебску забаранілі дзве акцыі на 19 снежня

Мясцовыя актывісты меркавалі правесці акцыі салідарнасці з палітвязнямі, якія апынуліся ў зняволенні пасля падзеяў у Мінску год таму. Але віцебскі гарвыканкам не дазволіў ні сходу каля “Сіняга дому” на вуліцы Леніна, ні шэсця да плошчы Свабоды.

14.12.2011 Першае траўматычнае здарэнне на пляцоўцы Астравецкай АЭС

Выявілася, што на пляцоўцы выкарыстоўваюцца дызельныя перасоўныя электрастанцыі, пры эксплуатацыі якіх парушаецца тэхніка бяспекі. 1 снежня на аб’екце працаваў стажор, жыхар Астраўца Алег Січынскі. Пры спробе рамантаваць трубавод радыятара ахалоджвання дызельнай электрастанцыі, яму адрэзала тры пальцы.

14.12.2011 Праваабаронца Павал Левінаў сустрэўся з начальнікам калоніі “Віцьба-3″

13 сьнежня па ініцыятыве віцебскага праваабаронцы Паўла Левінава адбылася яго сустрэча з начальнікам папраўчай калёніі “Віцьба-3″ палкоўнікам Віталём Агністыкавым. Мэтай сустрэчы было высьвятленьне сытуацыі з умовамі ўтрыманьня палітвязьня Андрэя Саньнікава, які адбывае пакараньне ў гэтай калёніі.

14.12.2011 У Магілёўскай абласной дзіцячай бальніцы прымушаюць падпісвацца на дзяржвыданні

Кожная медсястра мусіць зрабіць падпіску на сумму 80-95 тысяч рублёў, лекары - у сярэднім на 150 тысяч. Пасля звароту супрацоўніцы па гэтым пытанні ў Магілёўскі гарвыканакам апошні пераслаў яго на разгляд адміністрацыі Магілёўскай абласной дзіцячай бальніцы.

14.12.2011 Акцыя ў падтрымку Бяляцкага на Еўрапейскім кангрэсе правоў чалавека (фота)

Салігорскі маладафронтавец Іван Шыла правёў акцыю ў падтрымку Алеся Бяляцкага на Кангрэсе правоў чалавека, які праходзіў у польскіх Катовіцах. Акцыю падтрымалі як шараговыя студэнты ўніверсітэту, так і вядомыя палітыкі і госці Кангрэсу з розных краін.