Праваабарончы цэнтр «ВЯСНА»

Навіны за 21 кастрычніка 2011

21.10.2011 Моладзевая актывістка Кацярына Рамашкевіч паведамляе пра ціск з боку КДБ

Дзяўчына, якая з'яўляецца сябрам “Моладзі БНФ” і Партыі БНФ, распавядае пра тэлефонныя атакі з боку спецслужбаў, якія распачаліся на гэтым тыдні. У выніку яе запрасілі з'явіцца на гутарку ў магілёўскае аддзяленне КДБ. Кацярына паведаміла, што без позвы нікуды не пойдзе. Яна называе нумары тэлефонаў, з якіх ішлі тэлефанаванні.

21.10.2011 Акцыя салідарнасьці: затрыманьні

21 кастрычніка а 19-й гадзіне на Кастрычніцкай плошчы ў Менску ладзіцца акцыя з патрабаваньнем вызваліць вязьняў сумленьня. Арганізатар – грамадзянская кампанія "Эўрапейская Беларусь". Масавыя затрыманьні актывістаў гэтай арганізацыі пачаліся яшчэ з раніцы.

21.10.2011 Лесапарк Салігорску будуць высякаць пад футбольныя палі

Мясцовыя ўлады не пакідаюць спробаў знічшчыць салігорскую лесапаркавую зону. Гэтым разам замест некалькіх гектараў катэгарыйнага лесапарку чыноўнікам прыйшла ідэя зрабіць футбольныя палі. Канфлікт мясцовых жыхароў з гарадскімі ўладамі пачаўся яшчэ ў лістападзе 2010 году.

21.10.2011 Міжнародныя праваабаронцы занепакоеныя будучыняй беларускіх няўрадавых арганізацый

Прадстаўнікі міжнародных праваабарончых арганізацый звярнуліся да верхняй палаты беларускага парламента з настойлівым заклікам не ўхваляць нядаўнія папраўкі ў заканадаўства, што абмяжоўваюць свабоду сходаў і свабоду асацыяцыі і жорстка абмяжоўваюць дзейнасць беларускіх грамадзянскіх груп, асабліва тых, якія займаюцца правамі чалавека або сумежнымі пытаннямі.

21.10.2011 Андрэй Пачобут рыхтуе скаргу ў Вярхоўны суд

Зараз Пачобут рыхтуе чарговую скаргу – на гэты раз у Вярхоўны суд. Журналіст не мае асаблівых ілюзій на змену прысуду і намераны ў выпадку пацверджання першаснага прысду звяртацца ў Камітэт па правах чалавека ААН.

21.10.2011 Тэрміновая заява Абсерваторыі па абароне праваабаронцаў па справе Валянціна Стэфановіча

21 кастрычніка Абсерваторыя па абароне праваабаронцаў, сумесная праграма Міжнароднай федэрацыі правоў чалавека (FIDH) і Сусветнай арганізацыі супраць катаванняў (OMCT), распаўсюдзіла тэрміновую заяву з нагоды адміністратыўнага пераследу Валянціна Стэфановіча, намесніка старшыні Праваабарончага цэнтра “Вясна”.

21.10.2011 Барысаў: зборшчыка подпісаў за НС да гэтага часу не пакідаюць у спакоі

Зборшчык подпісаў за правядзенне Народнага сходу барысаўчанін Мікалай Ільюшонак да гэтага часу чакае суда па арт. 23.32 КаАП «Парушэнне парадку арганізацыі або правядзення масавага мерапрыемства або пікетавання».

21.10.2011 Рабочыя Магілёўскага домабудаўнічага камбіната гатовы страйкаваць

У арганізацыі створаны страйкам, у склад якога ўвайшло сем чалавек. Перадумовамі для прадстрайкавай сітуацыі сталі перыядычныя затрымкі з выплатай заробкаў на 10 і болей дзён рабочым цягам апошніх некалькіх месяцаў.

21.10.2011 Баранавічы: не дазволілі велапрабег – прашу дазволіць марафонскую хадзьбу

Баранавіцкі гарвыканкам не дазволіў прадпрымальніку Мікалаю Чарнавусу правядзенне велапрабегу ў Баранавічах 27 кастрычніка. Актывіст хацеў праінфармаваць грамадскасць горада і раёна аб адмове Баранавіцкім райвыканкамам у прадастаўленні мясцовым прадпрымальнікам ў арэнду калгасных фермаў, якія зусім не выкарыстоўваюцца.

21.10.2011 Гомельскі абласны суд адмовіўся разглядаць скаргу Андруся Цянюты

Суддзя Дзмітрый Улога адмовіўся разглядаць скаргу апазіцыянера на той падставе, што Андрусь Цянюта не паспеў у вызначаны тэрмін абскардзіць рашэнне. Але актывіст не мог гэта зрабіць па аб'ектыўных прычынах: ён адбываў пакаранне, 10 сутак арышту, і вядома, не мог падаць скаргу ў суд.

21.10.2011 Наталля Манькоўская: “Мы імкнемся спарадзіць дыскусію ў грамадстве”

Намесніца старшыні праваабарончага праекту “ГейБеларусь” Наталля Манькоўская распавяла пра ўстаноўчы сход арганізацыі і сваю дзейнасць у арганізацыі, якая адстойвае правы ЛГБТ-супольнасці.

21.10.2011 Пракуратура заявіла, што вязняў Глыбоцкай турмы збівалі законна

Па даручэнні Генеральнай пракуратуры Беларусі следчым аддзелам пракуратуры Віцебскай вобласці праведзена праверка фактаў прымянення фізічнай сілы да вязняў турмы ў Глыбокім, пра якія шырока паведамлялася ў інтэрнэце. Факты пацвердзіліся, але дзеянні турэмнай аховы прызнаны правамернымі.

21.10.2011 Прыбыткамі журналіста з Крычава працягваюць цікавіцца падаткавікі

Рэдактар крычаўскай недзяржаўнай маланакладнай газеты “Вольны горад” Сяргей Няроўны днямі падаў у мясцовую падатковую інспекцыю дэкларацыю аб даходах і маёмасці за апошнія два гады. Прадстаўнікі міністэрства па падатках і зборах знянацку зацікавілісь крыніцамі даходаў незалежнага журналіста.

21.10.2011 Асуджаны па справе анархістаў Мікалай Дзядок не пакідаў выпраўленчую калонію №15

Пра гэта сёння паведаміла адміністрацыя калоніі актывістцы кампаніі «Наш Дом» Крысціне Шацікавай. Нагадаем, што актывісты высылалі грашовы перавод у памеры 100 тысяч рублёў Мікалаю Дзядку, аднак учора Крысціна Шацікава атрымала ўведамленне, у якім было пазначана, што перавод не дайшоў да адрасата ў сувязі з адсутнасцю (вызваленнем) адрасата.

21.10.2011 Мірзаянава не пакідаюць у спакоі нават пасьля памілаваньня

Памілаванага фігуранта “Плошчы” Фёдара Мірзаянава сёньня каля 8-30 раніцы забралі з кватэры ў Менску супрацоўнікі міліцыі ў цывільным. Адзін з іх назваўся старшым інспектарам Ленінскага РУУСа Аляксандрам Целавусам. Сябры спрабавалі даведацца пра ягоны лёс у дзяжурнага па РУУСу, алё ён паведаміў, што Мірзаянава ў іх няма.