Раніцай 9 чэрвеня па вяртаньні з-за мяжы проста на памежным пераходзе быў затрыманы актывіст “Моладзі БНФ” Антон Каліноўскі. Як стала вядома, памежнікі пратрымалі яго больш за чатыры гадзіны. За гэты час у актывіста забралі на праверку ноўтбук і правялі асабісты дагляд. Інфармацыя пра тое, нібыта Антона Каліноўскага хочуць забраць у войска не падцвердзілася.
Група валанцёраў распачала кампанію супраць жорсткага абыходжаньня з бяздомнымі жывёламі на Мінскім прадпрыемстве “Фаўна горада”. Трывожная сітуацыя на гэтым прадпрыемстве асветлена ў публікацыях на інфармацыйных сайтах. У сувязі з негуманным стаўленьнем да жывёл з боку кіраўніцтва “Фаўны горада” на адрас пракурора Маскоўскага раёна Мінска накіраваны зварот з просьбай правесці адпаведную праверку. Ініцыятары кампаніі запрашаюць ахвочых таксама адправіць аналагічныя звароты ў пракуратуру і падаюць адпаведны ўзор звароту.
Беларуская партыя "Зялёныя" (БПЗ) патрабуе ад Палаты прадстаўнікоў Нацыянальнага Сходу Беларусі тэрміновага прыняцця закона, які абараняе жывёл ад жорсткага абыходжаньня. Такое патрабаваньне ўтрымоўваецца ў рэзалюцыі цэнтральнай рады БПЗ.
Сябра апальнага Саюза палякаў у Беларусі, журналіста Андрэя Пачобута выклікалі ў пракуратуру Гарадзенскай вобласці. Яму зачыталі афіцыйнае папярэджанне аб недапушчэнні парушэння заканадаўства Беларусі. Пачобута папярэдзілі аб тым, што ён не мае права прадстаўляцца старшынёй Галоўнай Рады «Саюза палякаў у Беларусі», а таксама афіцыйна забаранілі карыстацца сімволікай СПБ.
Разгляд крымінальнай справы віцебскага праваабаронцы Леаніда Свеціка ў Віцебскім абласным судзе прызначаны на 10 чэрвеня. Суддзёй у гэтай справе прызначана Галіна Урбановіч. Леаніда Свеціка вінавацяць у распальваньні расавай, нацыянальнай ці рэлігійнай варожасьці па ч.1 арт. 130 Крымінальнага Кодэксу Рэспублікі Беларусь.
 |
|
 |