Праваабарончы цэнтр «ВЯСНА»

Назіральніку з Ваўкавыску Віталю Гуляку, зарэгістраванаму ў акруговай камісіі па Ваўкавыскай выбарчай акрузе №48, адмовіліся паказаць спісы складу ўчастковых выбарчых камісій. Прадстаўнікі камісіі спаслаліся на тое, што поўныя склады ўчастковых камісій будуць надрукаваны ў мясцовай раённай газеце, якая выйдзе ў суботу.

Па словах Сяргея Салаша, сябра Партыі БНФ, які збіраецца балатавацца па Барысаўскай сельскай выбарчай акрузе №63, адзінаццаць яго прыхільнікаў спрабавалі патрапіць ва ўчастковыя камісіі гэтай акругі.

У Жлобінскай выбарчай акрузе ў склад участковых выбарчых камісій не ўключаны ніводны прадстаўнік дэмакратычных сіл. У суседняй Рагачоўскай акрузе толькі ў адну з участковых камісій патрапіў прадстаўнік апазіцыі.

З 83 прэтэндэнтаў дэмсілаў у члены ўчастковых выбарчых камісій улады Гомеля ні аднаго не ўключылі. На ўсіх 222 участках будуць працаваць вылучэнцы працоўных калектываў, грамадскіх аб'яднанняў і грамадзян.

Праўладныя прэтэндэнты на дэпутацкі мандат бессаромна распачалі датэрміновую агітацыю. На гарадзенскім заводзе карданных валаў за прахадной вывешаныя каляровыя плакаты прэтэндэнта на дэпутацкі мандат Сяргея Маскевіча, які збіраецца балатавацца па Гарадзенскай цэнтральнай акрузе № 50 і з’яўляецца на сённяшні дзень дэпутатам Палаты прадстаўнікоў Нацыянальнага сходу Рэспублікі Беларусь. Плакаты заклікаюць выбаршчыкаў прагаласаваць менавіта за Маскевіча і змяшчаюць яго каляровае фота і біяграфічныя звесткі.

На Гарадзеншчыне пакуль невядомыя дакладныя склады ўсіх участковых камісій. Гэдак, па сельскіх акругах іх поўныя спісы з’явяцца толькі ў суботніх раённых газетах. Але ўжо можна сцвярджаць, што іх фармаваньне адбылося абсалютна келейна. Па-сутнасьці сур’ёзнага разгляду заяваў ва участковыя камісіі і не было, бо большасць паседжанняў выканкамаўскіх структураў адбылася ў экспрэс-рэжыме ў панядзелак зранку.

На Гарадзеншчыне аніводны прадстаўнік дэмакратычных партый не трапіў у склад участковых выбарчых камісій.

У Віцебску працягваецца датэрміновая агітацыя ў сродках масавай інфармацыі. Так гарадская газета "Витьбичи" (№ 92 ад 12.08.2008) апублікавала артыкул пра Аляксандра Ласякіна, які прапаноўваецца для вылучэння кандыдатам у дэпутаты Палаты прадстаўнікоў Нацыянальнага сходу Рэспублікі Беларусь па Віцебскай-Кастрычніцкай выбарчай акрузе №20. Ужо сам назоў артыкула: "Усё зробім, якая гутарка!", ёсць ні што іншае, як перадвыбарнае абяцанне Аляксандра Ласякіна.

Даты і час першых паседжанняў участковых выбарчых камісій Віцебскіх сельскага (№21), Чкалаўскага (№18) і Кастрычніцкага (№20) трымаліся ў строгай таямніцы.