36 ініцыятыўных груп прэтэндэнтаў з "еўрапейскага спісу" ўжо сабралі неабходны мінімум подпісаў (больш за адну тысячу) для вылучэння кандыдатаў у дэпутаты. Пра гэта 7 жніўня на прэс-канферэнцыі ў Мінску паведаміў старшыня аргкамітэта па стварэнні Беларускай сацыял-дэмакратычнай партыі (Народная Грамада) Мікалай Статкевіч.
Сёння, 7 жніўня, да следчага КДБ была выкліканай незалежная журналістка Алёна Сцяпанава. Яе дапыталі ў якасці сведкі па так званай справе лістоў з пагрозамі ад імя незарэгістраванай арганізацыі Рускае нацыянальнае адзінства. Следчага цікавіла, дзе і пры якіх абставінах журналістка бачыла гэтыя лісты, а таксама, якія яна ведае праваабарончыя арганізацыі. Падрабязнасцяў допыту Алёна Сцяпанава не распавяла, бо гэта тычыцца тайны следства.
Пасля апублікавання складу акруговых выбарчых камісіі па Мазырскай выбарчай акрузе №42 выявілася, што за аднаго з сябраў гэтай камісіі Івана Раманавіча Навіцкага (намесніка дырэктара па ідэялогіі ААТ “Беларускабель”), вылучанага ад працоўнага калектыву гэтага прадпрыемства, сходу працоўнага калектыву ці канференцыі не праводзілася.
Незалежны назіральнік зарэгістраваны па Гарадзенскай паўночнай выбарчай акрузе № 52 Зміцер Слуцкі паведаміў, што пасля рэгістрацыі ініцыятыўных групаў камісія не збіралася аніводнага разу. На штодзённыя тэлефонныя званкі яму адказвалі, што сходу камісіі у канкрэтны дзень не будзе. Сёння ён асабіста зайшоў да старшыні камісіі, якая паведаміла, што збірацца камісія пакуль што не бачыць неабходнасці.
У Вярхоўным Судзе Беларусі адбыўся разгляд скаргі на дзеяньні Вілейскай акруговай камісіі № 64 і Цэнтральнай выбарчай камісіі РБ, якія адмовілі ў рэгістрацыі ініцыятыўнай групы прэтэндэнта ў кандыдаты сп. Вінаградава. Скаргадаўцы - дзевяць чалавек са спісу незарэгістраванай ініцыятыўнай групы Зміцера Вінаградава - кіраўніка Мінскай абласной арганізацыі БНФ з Мядзельшчыны.
Зборшчык подпісаў за апазіцыйнага кандыдата Яраслава Раманчука, які зарэгістраваў сваю ініцыятыўную групу на Гарадзенскай паўночнай акрузе № 51, Алег Калінкоў заўважыў групу маладых людзей, якія збіралі подпісы на вуліцы ў грамадзянаў без пашпартоў і не запісвалі пашпартныя дадзеныя.
Сябра Ясенінскай аруговай выбарчай камісіі №100 актывіст Руху “За Свабоду” Юрась Меляшкевіч накіраваў у Цэнтральную камісію Рэспублікі Беларусь па выбарах і правядзенні рэспубліканскіх рэферэндумаў запыт адносна забароны карыстання партатыўнымі кампутарамі падчас працы камісіі.
 |
|
 |